बिर्तामोड । झापाबाट सशस्त्र प्रहरीले ठूलो मात्रामा गाँजा बरामद गरेको छ । शुक्रबार ४:२० बजे बुद्धशान्ति गाउँपालिका–४ स्थित मेची राजमार्गबाट २ वटा ट्रकमा राखेर लैजाँदै गरेको १६ सय ३६ किलो गाँजा सशस्त्र प्रहरीले बरामद गरेको हो ।

विशेष सुचनाको आधारमा सशस्त्र प्रहरी बल, नेपाल नं. १ बराह बाहिनी मुख्यालयबाट सशस्त्र प्रहरी उपरीक्षक बिक्रम होमागाईको कमाण्डमा खटिएको विशेष अनुगमन टोली र नं. २ गण झापा मातहत सुरक्षा वेश टिमाईबाट खटिएको संयुक्त सुरक्षा फौजले ईलामबाट झापातर्फ आउँदै गरेको को १ ख ५००१ र प्र १–०२–००२ ख ०५८४ नम्बरको मिनि ट्रकलाई चेकजाँच गर्ने क्रममा गाँजा फेला परेको सशस्त्र प्रहरी बल नं. २ गण हेक्वा झापाका प्रमुख सशस्त्र प्रहरी उपरीक्षक कुलबहादुर भण्डारीले जानकारी दिए ।

५७ वटा बोरामा राखिएको गाँजासहित प्रहरीले धनकुटा जिल्लाको शहिदभूमी नगरपालिका–४ बस्ने महेश राई र ईलाम जिल्लाको माईजोगाई गाउँपालिका–२ बस्ने ३७ बर्षीय गंगा बहादुर बस्नेतलाई नियन्त्रणमा लिएको उनले बताए ।

सशस्त्र प्रहरीले उनीहरुको साथबाट नेपाली ८७ हजार ८ सय ८० रुपैयाँ र ५ थान मोवाईल सेट समेत बरामद भएको जनाएकोछ । नियन्त्रणमा लिईएकाहरुलाई बरामद गाँजा तथा ट्रक सहित आवश्यक कारवाहीको लागि जिल्ला प्रशासन कार्यालय झापामा बुझाइएको बताइएको छ ।