बिर्तामोड । भन्सार छलिगरी अवैध सामान भित्र्याउने क्रममा एक भारतीय पक्राउ परेका छन् । भारत पश्चिम बंगाल खोरीबारी निवासी ३४ बर्षीय अमित सिंहलाई अवैध सामान र गाडीसहित प्रहरीले पक्राउ गरेको हो ।

शुक्रबार दिउँसो अन्दाजी साढे १२ बजे मेचीनगर वडा नम्बर ६ कालिखोलामा भारतबाट अवैध रुपमा नेपाल ल्याउँदै गरेको मोटर पार्टस र मोबिलसहित सिंह पक्राउ परेको जिल्ला प्रहरी कार्यालय झापाका सुचना अधिकारी डिएसपी खगेन्द्र खड्काले जानकारी दिए ।

उनले डब्लुबी ७४ एस २१५२ नम्बरको भारतीय कारको सिट मुनी फल्स बटम बनाई अवैध रुपमा लुकाई छिपाई १ लाख १५ हजार ५८२ रुपैँया बराबरको अवैध सामान ल्याउँदै गरेको अवस्थामा पक्राउ परेको प्रहरीले जनाएको छ ।

पक्राउ परेका सिंहलाई अवैध सामान र अन्दाजी ८ लाख मुल्यको कारसहित थप अनुसन्धानका लागि मेची भन्सार कार्यालय काँकरभिट्टा बुझाइएको प्रहरीले जनाएको छ ।