बिर्तामोड । सेतो टोपी, आकाशे रङ्गको सर्ट, गाढा नीलो पेन्ट र कालो जुत्ता लगाएर सिटी फुक्दै सडकमा देखिनु उसको परिचय हो । सवारी साधन र पैदल यात्रुको सहज आवागमनको व्यवस्था मिलाउनु उसको दैनिकी हो ।

सडकमा सवारी साधनको चेकजाँच गर्नु, पैदल यात्री तथा सवारी साधनको आवागमनमा सहजता ल्याउनु र दुर्घटना न्यूनीकरणका कार्य गर्नु उनीहरूको मुख्य जिम्मेवारी हो । तर झापाका ट्राफिक प्रहरीको परिचय र गतिविधि त्यतिमा मात्र सीमित छैन । उनीहरू कहिले विद्यार्थी, कहिले चालक त कहिले पैदल यात्रीहरूलाई पढाइरहेको भेटिन्छन् ।  जिल्ला ट्राफिक प्रहरी कार्यालय झापाका प्रमुख प्रहरी निरीक्षक गणेश पौडेल नै उक्त कार्यमा क्रियाशील छन् । ट्राफिक प्रहरी पोष्ट काँकरभिट्टाका इञ्चार्ज प्रहरी नायव निरीक्षक पुर्ण गौतमलगायत अन्य ट्राफिक पोस्टका प्रमुखहरूले उनलाई दैनिक जसो सो कार्यमा सहयोग गरिरहेका हुन्छन् ।

सवारी पार्किङ क्षेत्र आसपास चालकहरूलाई भेला गरेर ट्राफिक नियम सम्बन्धी प्रशिक्षण समेत उनीहरूले दिने गरेका छन् ।

सडकमा खटिएर मात्रै सडक सवारी सुरक्षा नहुने पौडेल बताउँछन् । विद्यालय स्तरबाट नै ट्राफिकसँग सम्बन्धित सचेतना जगाउन जरुरी रहेको उनको भनाइ छ । त्यसैले होला उनी ट्राफिक लाइट सम्बन्धी जानकारी दिने उद्देश्यले तीन वटा रङ भएको बत्ती जडित काठको नमुना ट्राफिक लाइट बोकेर विद्यालय–विद्यालयमा पुगिरहेका हुन्छन् । त्यति मात्र होईन ट्राफिक सम्बन्धी जानकारी गराउने उद्देश्यले आफ्ना सहकर्मीहरूलाई समेत विद्यालयमा पठाउने गरेका छन् । झापा ट्राफिकले चालु आवमा ३ हजार ७६२ पटक यस्ता सचेतनामुलक कार्यक्रम गरिसकेको कार्यालय प्रमुख पौडेलको भनाई छ । यस्ता कार्यक्रमबाट १ लाख ५५ हजार ५३ जना मानिस लाभान्वित भएको उनले बताए ।

दुर्घटनाका निमित्त सडक, सवारी साधन र चालकको शारीरिक र मानसिक अवस्था मुख्य जिम्मेवार रहेको उनी बताउँछन् । उनले मातहतका कर्मचारीहरूलाई सडकमा खटाएर चालकहरुले मादक पदार्थ तथा लागूऔषध सेवन गरे नगरेको समेत चेकजाँच गर्ने गराउने गरेका छन् । उनीहरूले सवारी चालकको लाइसेन्स, सवारी साधनको ब्लुबुक भए नभएको र नवीकरण गरे नगरेको जाँच गर्ने गरेका छन् ।

यसका अतिरिक्त ट्राफिक प्रहरी कार्यालय झापाले सामाजिक सञ्जालमार्फत समेत सचेतना फैलाउने काम गरिरहेको छ । झापा ट्राफिकले फेसबुक पेज मार्फत सचेतनामूलक भनाइहरु पाठकसम्म र्पुयाउने काम गरिरहेका छन् ।