झापा । ‘नो केबलकार’ समूहले सरकारसँग वार्ताको लागि फेरि वार्ता टोली बनाएको छ ।

‘मुक्कुमलुङ तासेः प चुम्भो र मुक्कुमलुङ संरक्षण अन्तरदलीय संघर्ष समिति’ ले सरस्वता सिंगकको नेतृत्वमा १० सदस्यीय वार्ता टोली गठन गरेको हो । समितिका सदस्यहरुमा कुमार लिम्बू, सूर्य विक्रम चेम्जोङ, धनराज हुक्पा चोङबाङ (फेदापे), दिपक याक्खा, लबन न्यौपाने, सन्तोष मेहता, पदम जबेगु, आलोक माबोहाङ र अर्जुन जुम्नेली रहेका छन् ।

अन्तरदलीय संघर्ष समितिमा १३ वटा पहिचानवादी संस्था र ११ वटा दल आवद्ध छन् । सरकारद्वारा गठित वार्ता टोली ले २ दिन अघि पनि वार्ताका लागि आह्वान गरेको थियो ।

जसमा राष्ट्रिय मुक्ति पार्टीका राजेन्द्र महतोदेखि, पहिचानवादी मोर्चाका संयोजक महेन्द्र लावतीसम्म छन् ।

ताप्लेजुङको पाथीभरा क्षेत्रका केबलकार बनाउन नहुने माग राख्दै उनीहरुले आन्दोलन गर्दै आएका छन् । काफ्लेपाटीदेखि पाथीभरा मन्दिर क्षेत्रसम्म जाने केबलकार निर्माणका लागि आइएमइ समूहका चन्द्र ढकालले निर्माण कार्य शुरु गरेसँगै आन्दोलन चर्किएको थियो ।