बिर्तामोड । झापाका पुराना निर्माण व्यवसायी हिमाल सिटौला पक्राउ परेका छन् । चेक अनादर मुद्धामा सिटौलालाई प्रहरीले मंगलबार पक्राउ गरेको हो ।

बिर्तामोड–७ निवासी सिटौलालाई प्रहरीले मंगलबार नै अदालतबाट पाँच दिनको म्याद लिएको छ । सिटौला बिरामी रहेका कारण ओमसाई पाथिभरा अस्पतालमा उपचारका लागि पठाइएको जिल्ला प्रहरी कार्यालय झापाले जनाएको छ ।

राज्यले समयमा निर्माण व्यवसायीलाई भुक्तानी नदिँदा अन्य व्यवसायीको रकम भुक्तानीमा समस्या भइरहेको एक निर्माण व्यवसायीले बताए । ‘राज्यले काम गरेको पैसा समयमा दिँदैन, अनि ठेकेदारहरु यसरी जेल जानु पर्ने अवस्था आयो, यसरी कसरी काम गर्न सकिन्छ ?’ उनले प्रश्न गरे ।

सिटौलाले काम गरे बापत राज्यबाट १ करोड बढी भुक्तानी लिन बाँकी रहेको बुझिएको छ ।