बिर्तामोड । बिर्तामोड नगरपालिकामा सरुवा भएर आएका प्रमुख प्रशासकीय अधिकृत सागर मिश्रले आज कार्यालयमा हाजिर भएका छन् ।

कागेश्वरी मनोहरा नगरपालिका काठमाडौबाट सरुवा भएर बिर्तामोड आएका मिश्रलाई बिर्तामोड नगरपालिकाका कार्यबाहक नगर प्रमुख नगेन्द्रप्रसाद संग्रौलालगायतले स्वागत गरेका थिए ।

स्वागत कार्यक्रममा बोल्दै कार्यबाहक नगर प्रमुख संग्रौलाले कर्मचारीलाई राजनीति नगर्न र कामसंगै अनुशासनमा ध्यान पुर्याउन निर्देशन दिए । सबैले तहगत जिम्मेवारी पुरा गर्नु पर्नेमा जोड दिँदै उनले प्रक्रियागत ढंगले आएका कामहरु कुनै पनि बहानामा नरोक्न सुझाब दिए ।

यसैगरी कार्यक्रममा बोल्दै प्रमुख प्रशासकीय अधिकृत मिश्रले विकासको काममा पर्खेर नबस्ने प्रतिबद्धता व्यक्त गरे । जनप्रतिनिधि र प्रशासन विच नङ र मासुको सम्बन्ध हुनु पर्नेमा जोड दिँदै उनले कर्मचारीलाई कुनै समस्या भए आफुसंग आएर कुरा गर्न सुझाब दिए । दैनिक सेवा प्रवाहमा कुनै पनि समस्या हुन नहुने भन्दै मिश्रले यहाँका समस्यासंग आफु परिचित रहेको पनि बताए ।

प्रमुख प्रशासकीय अधिकृत मिश्रसंग यस अघि जिल्ला प्रशासन कार्यालय, जिल्ला विकास समिति, अख्तियार अनुसन्धान आयोग, वाणिज्य विभाग, वीर अस्पताल लगायतका कार्यालयमा काम गरेको लामो अनुभव छ ।

यस अघिका दुई प्रमुख प्रशासकीय अधिकृत छोटो समयमा नै सरुवा भएर गएपछि बिर्तामोडमा प्रमुख प्रशासकीय अधिकृत टिक्न गाह्रो हुन थालेको टिप्पणी हुँदै आएको छ ।