बिर्तामोड । मंगलबार झापाको कनकाई नगरपालिका वडा नम्बर ४ स्थित भित्री सडक खण्डमा प्रहरीले दुई जना भारतीय लागूऔषध कारोबारीलाई गोली प्रहार गरी पक्राउ गरेको थियो । भारतीय नम्बरको मोटरसाइकल चेकजाँच गर्ने क्रममा ड्युटीमा रहेका प्रहरीलाई ठक्कर दिइ उनीहरु भाग्न खोजेपछि प्रहरीले गोली प्रहार गरेको जनाएको छ ।

मंगलबार साँझ ६ः३० बजे कुमरखोदबाट सुरुङगा तर्फ आउदैं गरेको बीआर३७एए८४९८ नम्बरको भारतीय मोटरसाइकलमा आएका भारतको विहार राज्यस्थित डिगल बैंक थाना वडा नम्बर ५ स्थायी ठेगाना भएका बर्ष २८ बर्षीय अन्जार आलम (चालक) र मोटरसाईकल पछाडी सवार सोहि स्थानका निजको सहोदर भाई अन्दाजी बर्ष १९ को युसुब आलमलाई प्रहरीले पक्राउ गरेको थियो । उनीहरुको साथबाट प्रहरीले लागूऔषध ब्राउन सुगर प्लाष्टिक सहित ३२ ग्राम ७५० मिलिग्राम ( प्लाष्टिक बाहेक ३० ग्राम ६९०) मिलिग्राम बरामद गरेको जिल्ला प्रहरी कार्यालय झापाले जनाएको छ । 

उनीहरुलाई चार राउण्ड हवाई फायर गर्दासमेत पक्राउ गर्न नसकेपछि चालक अन्जार आलमको देब्रे घुँडामुनि एक राउण्ड गोली प्रहार गरिएको र हाल उनको प्रादेशिक अस्पताल भद्रपुरमा उपचार भइरहेको प्रहरीले जनाएको छ ।

यसअघि पनि प्रहरीले गत बैशाख १७ गते झापा गाउँपालिका–३ स्थित कुमरखोदमा गोली प्रहार गरी एक जना लागूऔषध कारोबारीलाई नियन्त्रणमा लिएको थियो ।