बिर्तामोड ।  झापा बिर्तामोड ८ का एक युवाले आफ्नो स्वर्गीय पिताको पुण्य तिथिमा विपन्न परिवारलाई खाद्यान्न र न्यानो कपडा वितरण गरेका छन् । स्वर्गीय पिता खड्गबहादुर कार्कीको  १३औ दिनको पुण्यतिथिपछि छोरा चिरञ्जीवी  कार्कीले  ५६  विपन्न  परिवारलाई खाद्यान्न र न्यानो लुगा  वितरण गरेका हुन् ।

पूर्व जनप्रतिनिधिसमेत रहेका आफ्ना  स्वर्गीय पिता खड्गबहादुरको  १३औँ दिनको पुण्यतिथि सकेपछि उनले बिर्तामोड–८ का   विपन्न र अपाङ्गहरुलाई   एक–एक थान ब्लांकेट, ४–४ केजीका दरले  चिनी र आटा , ५ केजी चामल र आधा लिटरका दरले खानेतेल वितरण गरेका हुन् ।  वडा नं ८ मा रहेको १४ वटा टोलका ४ जनाका दरले  सामग्री वितरण गरिएको हो ।   पिताको स्वर्गबासपछि  गुरु पण्डितहरुलाई  दान दक्षिणा दिएर  गर्नुपर्ने धर्मसंगै   मानवीय हिसाबले आफूले कर्म  निर्वाह गरेको कार्कीले बताए ।  कार्की गत स्थानीय तहको निर्वाचनमा बिर्तामोड ८ बाट वडाध्यक्ष पदका उम्मेदवार थिए । 

खड्गबहादुर साविक गरामनी गाउँ पञ्चायत र गाउँ विकास समितिका पूर्व जनप्रतिनिधि हुन् । उनको माघ ७ गते  बेलुका ८१ वर्षको उमेरमा निधन भएको थियो । वि.सं. २०४२ देखि २०५४ सम्म  साविक गरामनी  गाउँ पञ्चायत र त्यसपछि गाउँ विकास समिति वडा नं ४ को  उनी लगातार दुई पटक वडाध्यक्ष भएका थिए ।