बिर्तामोड । अनैतिक क्रियाकलापमा संलग्न रहेको आरोपमा पक्राउ परेका बिर्तामोड नगरपालिकाको स्वास्थ्य शाखामा कार्यरत सिनियर अहेब दीपक सापकोटा छुटेका छन् । सापकोटा शुक्रबार साँझ मिलापत्र गरी  छुटेको प्रहरीले जनाएको छ ।

सापकोटामाथि स्वास्थ्य शाखाकै मातहतमा कार्यरत एक महिला कर्मचारीसँग अनैतिक सम्बन्ध राखेको आरोप लगाइएपनि सो को पुष्टि हुन नसक्दा उनी छुटेको प्रहरीले जनाएको छ ।

बिहीबार शिवसताक्षी–१० दोमुखाको एक होटलमा ती महिलाका श्रीमान सुरज दर्नालले स्वास्थ्यकर्मी सापकोटा र महिलालाई होटलमा फेला पारेको भन्दै विवाद गरेको प्रहरीको भनाई छ । श्रीमान–श्रीमतीबिच विवाद उत्पन्न भएर होहल्ला भएपछि शान्ति सुरक्षाका लागि प्रहरी पुगेको जिल्ला प्रहरी कार्यालय झापाका सूचना अधिकारी डीएसपी कृष्णकुमार चन्दले बताए । प्रहरीले सापकोटा र ती महिलालाई होटलबाट नियन्त्रणमा लिएर इलाका प्रहरी कार्यलय झिलझिलेमा राखेको थियो । सोधपुछको क्रममा उनीहरु त्यहाँ कफि खान गएको प्रहरीलाई बताएका थिए ।

२४ घण्टासम्म पनि कुनै जाहेरी नपरेपछि अभियुक्तलाई थुनामा राख्न नमिल्ने प्रहरीले जनाएको छ । ‘सापकोटा जी र सुरज दर्नालबिचमा विवाद थियो त्यो अण्डरस्ट्याण्डिङ भयो र उहाँहरु जानु भयो,’ झिलझिले प्रहरी चौकीका प्रहरी निरीक्षक सुशिल थापा मगरले भने ।

होटलमा पुगेको भनिएकी ती महिला र उनका श्रीमान दर्नालबिच पारिवारिक बेमेल रहेको र सम्बन्ध विच्छेदको प्रक्रिया अगाडी बढेको बुझिएको छ ।