बिर्तामोड । झापाको बिर्तामोडमा प्रधान कार्यालय रहेको धौलागिरी पारिजात बहुउद्धेश्यीय सहकारी संस्था लिमिटेडले हल्दिबारी–१ स्थित सरस्वती माध्यमिक विद्यालयका विद्यार्थीहरुलाई स्वीटर वितरण गरेको छ ।

सहकारीको सामाजिक उत्तरदायित्व अन्तर्गत सोमबार विद्यार्थीहरुलाई स्वीटर वितरण गरिएको सहकारीका कार्यकारी प्रमुख कृष्ण पौडेलले जानकारी दिए । विद्यालयको ५ कक्षासम्म अध्ययनरत १२५ जना विद्यार्थीलाई ४० हजार मुल्य बराबरको स्वीटर वितरण गरिएको उनले बताए ।

सहकारीको गोल्धाप सेवाकेन्द्रको सहजीकरणमा भएको सो कार्यक्रममा विद्यालयका प्रधानाध्यापक प्रेम न्यौपानेले सहकारीले सरस्वती माविलाई रोजेर जाडोको समयमा बालबालिकालाई स्वीटर वितरण गरेको भन्दै धन्यवाद दिए । उनले सहकारीलाई आगामी दिनमा समेत सहयोग गरिदिन आग्रह गरे ।

कार्यक्रममा धौलागिरी पारिजात बहुउद्धेश्यीय सहकारी संस्थाका अध्यक्ष किशोर भट्टराई, सञ्चालक खड्ग तामाङ, व्यवस्थापक मोहन पनेरु, गोल्धाप सेवा केन्द्र प्रमुख शर्मिला सिग्देललगायतको उपस्थिती रहेको थियो ।