बिर्तामोड । ताप्लेजुङको फुङलिङ नगरपालिका–११ पाथीभरा क्षेत्रमा केबलकार निर्माणको विरोध गरिरहेको नो केबलकार समूहका चार जना घाइते भएका छन् । प्रहरीसँगको झडपमा घाइते मध्ये तीन जनाको अवस्था गम्भीर छ भने एक जना सामान्य छन् ।

जिल्ला प्रहरी कार्यालय ताप्लेजुङका डीएसपी रवि रावलका अनुसार घाइते भएका मध्ये यामबहादुर लिम्बू, सगुन लावती र धर्मान पालुङ्वाको अवस्था गम्भीर छ । मंगल लावतीको अवस्था सामान्य छ, उनको जिल्ला अस्पतालमा उपचार भइरहेको छ ।

पाथीभरा क्षेत्रमा केबलकार निर्माण गर्न नदिन आन्दोलन गर्दै आएको समूहले केबलकार निर्माणको काम शुरु भएपछि आइतबारबाट आन्दोलन चर्काउने उद्धेश्यले शनिबार सो क्षेत्रमा पुगेका थिए । आन्दोलन गर्ने खबर थाहा पाएपछि सशस्त्र र नेपाल प्रहरी शनिबार नै सो क्षेत्रमा पुगेको थियो । प्रहरीलाई देखेपछि प्रदर्शनकारीले ढुंगामुडा गर्दा झडप भएको प्रहरीले जनाएको छ । झडपको क्रममा १२ जना प्रहरीपनि घाइते भएको बताइएको छ ।

शनिबार बेलुका करिब ६ बजे पाथिभरा क्षेत्रको बलुडाडामा भएको झडपमा गम्भीर घाइतेहरुको जिल्ला अस्पतालमा उपचार सम्भव नभएपछि विराटनगरस्थित विराट मेडिकल कलेज रेफर गरिएको छ ।

ताप्लेजुङका प्रमुख जिल्ला अधिकारी नेत्रप्रसाद शर्माले आन्दोलनरत पक्षले बलुडाडाबाट गुलेली र ढुंगा प्रहार गरेपछि सुरक्षाकर्मीले गोली चलाएको दाबी गरे ।

शनिबार दिउँसो पनि प्रहरी र नो केबलकार पक्षबीच झडप भएको थियो । झडपमा प्रहरीले १२ सेल अश्रुग्यास प्रहार गरेको थियो । त्यो झडपमा पनि केही घाइते भएका थिए ।

ताप्लेजुङमा पाथीभरा जाने केबलकार निर्माणका लागि निर्माण कम्पनीले मंगलबारबाट काम सुरु गरेपछि तनावको अवस्था उत्पन्न भएको हो । पहिचान पक्षधरले केबलकार निर्माण गर्दा पाथीभरा क्षेत्रको पहिचान मासिने भन्दै ‘नो केबलकार आन्दोलन’ चलाइरहेका छन् ।