बिर्तामोड । झापाको बिर्तामोड–३ सैनिकमोडमा मुख्य कार्यालय रहेको विराट बहुउद्धेश्यीय सहकारी संस्थाले गत आर्थिक बर्षमा ८३ लाख १४ हजार ९०२ रुपैँया खुद आम्दानी गरेको छ । संस्थाको १७ औं बार्षिक साधारणसभाको पूर्व सन्ध्यामा बिहीवार आयोजित पत्रकार भेटघाट कार्यक्रममा सो जानकारी दिइएको हो ।

कार्यक्रममा संस्थाका अध्यक्ष मोहन सिवाकोटीले प्रतिवेदन सार्वजनिक गर्दै सहकारीले बर्षभरी गरेका गतिविधीका विषयमा जानकारी गराएका थिए । गतवर्ष १ करोड ५४ लाख ६३ हजार २६५ रुपैंयाँ जगेडा कोषमा रकम जम्मा गरेको संस्थाले यसबर्ष १ करोड ७५ लाख ४१ हजार ९९१ रुपैंयाँ जगेडा कोषमा राख्न सफल भएको अध्यक्ष शिवाकोटीको भनाई छ ।

संस्थाले सदस्य स्वास्थ्य उपचार सहयोग कोषमार्फत ५० जना सदस्यको स्वास्थ्य उपचारमा ८ लाख १९ हजार ५०० रुपैंयाँ सहयोग गरेको प्रतिवेदनमा उल्लेख छ । त्यस्तै ११ जनालाई सुत्केरी पोषण खर्च वापत ५५ हजार ५५ रुपैंयाँ, दुई जना सदस्यको  मृत्यु भएपछि सदस्य काजक्रिया खर्च वापत ४० हजार १० रुपैयाँ सहयोग प्रदान गरेको छ । संस्थाले काजक्रिया सरय खर्च बापत २९ जनालाई ३ लाख १२५ रुपैयाँ र सामाजिक उत्तरदायित्व अन्तरगत ४६ हजार ५०० रुपैयाँ सहयोग प्रदान गरेको बताइएको छ ।

सेवा केन्द्र बिस्तारको काम यसै आर्थिक बर्षभित्र गरिने संस्थाका प्रबन्धक रुद्रप्रसाद सिटौलाले बताए । उनले चाँडै गरामनीमा सेवाकेन्द्र विस्तार गर्न लागिएको बताए । सबै सदस्यको पहुँचमा सेवा पुर्याउनका लागि सुलभ सहकारी पसल, प्रबिधिमैत्री डिजिटल भुक्तानी, मोवाईल बैकिङ, एसएमएस, क्यूआर कोड सेवा बिस्तार गरिने संस्थाको लक्ष्य रहेको बताइएको छ । संस्थाका उपाध्यक्ष स्वर्गीय पर्शुराम सिटौलाको नाममा स्थापित ११ हजार १११ रुपैयाँ पुरस्कार राशीको पर्शुराम स्मृति पुरस्कार सामाजिक क्षेत्रमा बिशिष्ट योगदान पुर्याउने एकजना ब्यक्तिलाई साधारणसभाको अवसरमा शुक्रबार प्रदान गरिने बताइएको छ । सहकारीले उत्कृष्ट बचतकर्ताको रुपमा गणेश उप्रती, उत्कृष्ट ऋणि कुमारी कार्की बस्नेत र उत्कृष्ट कर्मचारी शान्तादेवि सेडाई सिटौलालाईसमेत सम्मान गर्ने बताइएको छ ।

झापा जिल्लाभर कार्यक्षेत्र रहेको संस्थामा आर्थिक बर्ष २०७८÷०७९ सम्ममा ३ हजार ३ सय १८ जना शेयर सदस्य रहेका छन् भने लगानीमा रहेको कर्जा ३० करोड, ६७ लाख ७३ हजार ९७४, संस्थामा रहेको बचत ३३ करोड ५६ लाख ७४ हजार ६८६ रुपैयाँ ४४ पैसा र आव २०७८÷०७९ को कुल कारोवार ४३ करोड २० लाख ४०८ रुपैयाँ ३५ पैसा रहेको पत्रकार भेटघाटमा वितरित प्रतिवेदनमा उल्लेख छ ।

संस्थाले कृषि क्षेत्रलाई प्रोत्साहन गर्ने नीति अनुरुप ५ लाख रुपैँयासम्म कृषकहरुलाई १३ प्रतिशत व्याजदरमा सहुलियत कृषि कर्जा उपलब्ध गराइने जानकारी दिएको छ । त्यस्तै सदस्यहरुलाई सुपथ स्वास्थ्य सेवा प्रदान गर्न विराट फार्मेसी सञ्चालन गर्ने उद्धेश्यले डा. लक्ष्मी मैनालीको संयोजकत्वमा अध्ययन समितिसमेत बनाइएको शिक्षा उपसमिति सदस्य अर्जुनकुमार पाठकले जानकारी दिए ।

पत्रकार भेटघाट कार्यक्रममा संस्थाका सल्लाहकार उमानाथ ओलीले बहुउद्धेश्यीय कारोबार अन्तर्गत कृषि क्षेत्रमा सहकारीले काम गर्नसके राम्रो हुने धारणा व्यक्त गरे ।