आजबाट हामी स्थापनाको दोस्रो बर्षमा प्रवेश गरेका छौँ । आज कै दिन गएको बर्ष असोज २२ गते घटस्थापनाको सुअवसर पारेर शुभारम्भ भएको परिवेश मिडियाले पहिलो बर्ष पार गरि दोस्रो बर्षमा प्रवेश गर्दा हामी हर्षित भएका छौँ ।

लोकतान्त्रिक गणतन्त्र र सुशासनको संस्थागत विकासमा हामीले निरन्तर कलम चलाई रहेका छौँ । मुलुकमा जारी भएको संविधानको पूर्ण कार्यान्वयनमा थुप्रै चुनौतीहरु छन् । मुलुक अस्थिरता र संक्रमणकालिन अवस्थाबाट नै गुज्रिरहेको अवस्था छ । संविधानको पूर्ण कायान्वयन गरी मुलुकलाई समृद्ध बनाउन हामी सबैको दायित्व रहेको छ । विकासका बाधकको रुपमा रहेका केहि कुरीति र अन्धविश्वासलाई शिक्षाको माध्यमबाट हटाउँदै लैजानुपर्ने आवश्यकता समेत रहेको छ ।

डिजिटल पत्रकारीताको माध्यमबाट स्थानीय समाचारहरुलाई चाँडो भन्दा चाँडो पाठकले पढ्न चाहने इच्छालाई पूरा गर्न हामीले हरदम प्रयत्न गरिरहेका छौँ । सबै जातजाति, भाषाभाषी, धर्मसंस्कृति, क्षेत्र, वर्ग, लिङ्ग, समुदाय, राजनीतिक दल आदिका समाचारहरुलाई हामीले समान रुपमा प्राथमिकताका साथ स्थान दिँदै आएका छौँ ।

हामीलाई सफलतापूर्वक पहिलो बर्ष पार गरी दोस्रो बर्षमा प्रवेश गराउन सहयोग गर्नुहुने सम्पूर्ण पाठकहरु, विज्ञापनदाता, समाचार स्रोत, सहकर्मीहरु तथा शुभचिन्तकहरु प्रति आभारी छौँ ।