चितवन । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ चितवनस्थित आफ्नै घरमा सरेका छन् । प्रचण्ड सोमबार विहान भरतपुर–१४ स्थित पुख्र्यौली जमिनमा बनेको घरमा सरेका हुन् ।

सोमबार विहान पार्टी निकट पत्रकार संगठन प्रेस सेन्टरले आयोजना गरेको शुभकामना आदानप्रदान कार्यक्रम सकेर प्रचण्ड नयाँ घरमा सरेको स्रोतले जानकारी दिएको हो । भरतपुर महानगरपालिका–१० मा रहेको छोरी रेनु दाहालको सरकारी निवासबाट झण्डै १६ किलोमिटर टाढा भरतपुर–१४ मा बनेको घरमा प्रचण्ड बिरामी श्रीमती सीतासहित शिवनगरको नयाँ घरमा सरेका छन् । प्रचण्डको नयाँ एकतले घर करीव १० कठ्ठा जग्गामा बनेको छ ।

मूलघर नजिकै सुरक्षाकर्मी र अन्य सहयोगी बस्नका लागि केही कोठा निकालेर टिनको छाना भएका अस्थायी संरचना पनि बनाइएको छ । काठमाडौंमा विवादास्पद ठेकेदार शारदाप्रसाद अधिकारीको घरमा बसेकामा आलोचना खेपेका प्रचण्डको घर पैत्रिक सम्पत्तिमा बनेको हो । यो जग्गा उनका बुवा मुक्तिरामले नाति प्रकाशका नाममा दिएको स्रोत बताउँछ ।