बिर्तामोड । काँकरभिट्टा–लौकही चार लेन सडक आगामी बर्षदेखि निर्माण शुरु हुने भएको छ । सो खण्डको १२० किलोमिटर सडक एसियाली विकास बैँकको सहयोगमा निर्माण हुने भएको हो । आइतबार बिर्तामोडमा आयोजित उक्त आयोजनाको वातावरणीय प्रभाव मूल्याङ्कनसम्बन्धि आयोजित सार्वजनिक सुनुवाई कार्यक्रममा सो सम्बन्धि जानकारी दिइएको हो ।

हालको २ लेनको सडकलाई ४ लेनमा स्तरोन्नति गरिने भएको हो । सडक एशियन हाइवे स्तरको हुने  कार्यक्रममा जानकारी दिइएको छ । आयोजनाको वातावरणीय प्रभाव मुल्याङ्कन प्रतिवेदनका सम्बन्धमा आयोजित सार्वजनिक सुनुवाई कार्यक्रममा यस सडकको बारेमा बिस्तृत जानकारी गराईएको थियो ।

झापा,मोरङ्ग र सुनसरी जिल्लालाई छुने यस सडकको आगामि पौषसम्ममा ठेक्का खुल्ने र आगामी वर्षको सुरुवात देखिनै निर्माणको काम सुरु हुने आयोजनाका वातावरण विज्ञ राजेन श्रेष्ठले जानकारी दिए । करिब २८ अर्व १७ करोड रुपैयाँको लगानीमा बन्न लागेको यस सडकको काम ३ वर्ष भित्रमा सम्पन्न हुने जनाइएको छ ।

झापामा यस सडकको भाग ५४.९ किलोमिटर रहेको छ । शहरी क्षेत्रमा साइकल लेन, फुटपाथ, ड्रेन सहित निर्माण हुने यस सडकको पहिलो चरणको काम काँकरभिट्टादेखि इटहरीसम्म सुरु हुने जनाइएको छ । यस आयोजनाबाट  १२ वटा नगरपालिका, ४ वटा गाउँपालिका र एउटा उपमहानगरपालिकाका ८२ वटा वडा प्रभावित हुने सामाजिक तथा पुनर्वास विशेषज्ञ रविन ढकालले बताए । उनले ३ सय मिटरभन्दा लामो पुल रहेको ६ ठाउँमा सिग्नेचर पुल बनाउने योजना रहेको जानकारी दिए ।

आयोजनामा काँकरभिट्टादेखि लौकहीसम्ममा साना ठुला गरि जम्मा ३ सय ७७ वटा संरचना हटाइने छ । जसमा बिर्तामोडको दुर्गा मन्दिर, जिल्ला ट्राफिक प्रहरी कार्यालयको पुरानो भवन लगायत ७ वटा संरचना हटाइने जनाइएको छ ।

सडकको ३ प्रकारको डिजाइन गरिएको जनाइएको छ । ग्रामिण र जंगल भएको क्षेत्रमा २४ मिटर, अर्धशहरी क्षेत्रमा ३३ मिटर र शहरी क्षेत्र तथा मुख्यबजार क्षेत्रमा ५० मिटर चौडाइको सडक निर्माण हुने छ । आयोजनाले काँकरभिट्टा, इटाभट्टा, चारआली, बिर्तामोड, दमक, झुम्का, विराटचोक, इटहरी लगायतका ९ वटा घनाबस्ती भएको स्थानमा ओभरहेड व्रिज तथा अण्डर पास निर्माण गर्ने जनाइएको छ ।