बिर्तामोड । प्रहरीले चलाएको गोली लागेर सुनसरीमा एक जना घाइते भएका छन् । गाँजा कारोबारी नियन्त्रणमा लिनका लागि प्रहरीले चलाएको गोली लागेर बराहक्षेत्र नगरपालिका–३ का ५५ वर्षीय रामप्रसाद लिम्बू घाइते भएका हुन् ।

शनिबार बेलुका करिब ८ बजे बराहक्षेत्र नगरपालिका–३ स्थित कालिन्द्र सामुदायिक बन क्षेत्रमा प्रहरीले ३ राउण्ड गोली चलाएको हो । लिम्बूको दाहिने तिघ्रामा गोली लागेको छ । उनलाई उपचारका लागि धरानस्थित बीपी कोइराला स्वास्थ्य विज्ञान प्रतिष्ठान लगिएको प्रहरीले जनाएको छ ।

शंकास्पद बोरा बोकेर हिडिरहेकाहरुलाई प्रहरीले रोक्न खोज्दा लिम्बूले खुकुरी प्रहार गर्न खोजेका थिए । अन्य भने बोरा छाडेर भागेका थिए । खुकुरी प्रहार गर्न खोजेपछि आत्मरक्षाका लागि गोली चलाएको सुनसरी प्रहरी प्रमुख सुमन तिम्सिनाले जानकारी दिए । घटनाको अनुसन्धान भइरहेको उनले बताए ।