बिर्तामोड । जापानीज इन्सेफलाइटिस (जेई)का कारण मृत्यु दर बढेपछि झापामा खोप अभियान सञ्चालन गरिँदैछ । असोज ५ गतेदेखि १५ गतेसम्म जेई विरुद्धको खोप अभियान सञ्चालन गर्न लागिएको हो ।

आज झापाको बिर्तामोडस्थित बीएण्डसी अस्पतालको सभाहलमा पत्रकार सम्मेलन गरि जिल्ला स्वास्थ्य कार्यालय झापाले खोप अभियान बारे जानकारी गराएको हो ।

जिल्ला स्वास्थ्य कार्यालय झापाका प्रमुख वृजकुमार दासका अनुसार भदौ ३० गतेसम्मको तथ्याङ्क अनुसार झापामा जापानीज इन्सेफलाइटिसबाट संक्रमित १३ जना मध्ये ७ जनाको मृत्यु भएको जानकारी दिए । मृतक मध्ये १ जना ८ बर्षको र बाँकी ५० बर्षमाथिको रहेको पाइएको उनले बताए । मृतकहरुले जेईको खोप लगाएको नपाइएको उनको भनाई छ ।

झापाको १५ वटै पालिकाका ३० बर्ष माथिकाहरुलाई खोप लगाइने कार्यालयले जनाएको छ । गर्भवती, एलर्जी भएकाहरु, ज्वरो आएकाहरु बाहेकले खोप लगाउन मिल्ने विश्व स्वास्थ्य संगठनकी प्रतिनिधी डा. संगिता साहले जानकारी दिइन् । खोप अत्यन्त सुरक्षित रहेको र यसको कुनै साइड इफेक्ट नरहेकोसमेत उनले बताइन् ।

झापामा पहिलो पटक अभियान सञ्चालन गर्न लागिएकाले लक्षित सम्पूर्ण उमेर समूहका मानिसलाई खोप लगाएर सुरक्षित रहन कार्यालय प्रमुख दासले आग्रह गरे ।

अभियानका लागि ५७०००० डोज खोप आइसकेको कार्यालयले जनाएको छ । कार्यालयका अनुसार अभियानको अधिकांश तयारी पूरा भइसकेको छ ।