बिर्तामोड । नेपाल शैक्षिक परामर्श संघ (इक्यान) ले अन्तर्राष्ट्रिय शिक्षा क्षेत्रमा कार्यरत संस्थाहरूको नेतृत्व क्षमता, संस्थागत सुदृढीकरण र राष्ट्रिय भूमिकालाई थप प्रभावकारी बनाउने उद्देश्यले ‘इक्यान लिडर्स मिट ३.०’ आयोजना गर्ने भएको छ।
कार्यक्रमको बारेमा इक्यान झापा शाखाले सोमबार पत्रकार सम्मेलन गरी कार्यक्रमबारे जानकारी दिएको हो।
असोज २ देखि ४ गतेसम्म झापाको बिर्तामोडस्थित द किङ्सबरी होटलमा आयोजना हुने कार्यक्रमको आतिथ्यता इक्यान झापा शाखाले गर्ने भएको हो। इक्यानको देशव्यापी नेतृत्वलाई एउटै राष्ट्रिय मञ्चमा ल्याउने उद्देश्यले आयोजना हुँदै आएको लिडर्स मिटको यो तेस्रो संस्करण हो।
यसअघि पहिलो इक्यान लिडर्स मिट इक्यान चितवन शाखाको आतिथ्यमा तथा दोस्रो संस्करण इक्यान मकवानपुर शाखाको आतिथ्यमा सम्पन्न भएको थियो। सोही निरन्तरतामा तेस्रो संस्करण आयोजना गर्ने जिम्मेवारी इक्यान झापा शाखाले पाएको हो।
कार्यक्रममा इक्यान केन्द्र, विभिन्न शाखा तथा समन्वय संरचनाका नेतृत्वसहित देशभरबाट करिब १५० जना नेतृत्व तहका प्रतिनिधिको सहभागिता रहने जनाइएको छ। कार्यक्रममा नेतृत्व विकास, संस्थागत सुशासन, सञ्चार सीप, वित्तीय व्यवस्थापन, रणनीतिक सोच तथा अन्तर्राष्ट्रिय शिक्षा क्षेत्रका समसामयिक विषयमा प्रशिक्षण र गहन अन्तरक्रिया हुने आयोजकले जनाएको छ।
इक्यानका अनुसार नेपालमा अन्तर्राष्ट्रिय शिक्षा क्षेत्र तीव्र गतिमा विस्तार भइरहेका बेला विद्यार्थीको विदेश अध्ययन, गन्तव्य छनोट, अन्तर्राष्ट्रिय विश्वविद्यालयसँगको सम्बन्ध, विद्यार्थी मोबिलिटी, डिजिटल प्रविधि तथा गन्तव्य मुलुकका बदलिँदा शिक्षा र अध्यागमन नीतिले यस क्षेत्रको भूमिकालाई थप चुनौतीपूर्ण र जिम्मेवार बनाएको छ।
यही बदलिँदो परिवेशमा अन्तर्राष्ट्रिय शिक्षा क्षेत्रमा कार्यरत संस्थाहरूलाई परम्परागत शैक्षिक परामर्शदाताको भूमिकाबाट माथि उठाउँदै विद्यार्थी, अभिभावक, नेपाली शैक्षिक संस्था, अन्तर्राष्ट्रिय विश्वविद्यालय, गन्तव्य मुलुकका सम्बन्धित निकाय तथा सरकारबीचको शैक्षिक सम्बन्धलाई जिम्मेवार, पारदर्शी, व्यावसायिक र विश्वसनीय ढंगले व्यवस्थापन गर्ने संस्थागत संरचनाका रूपमा विकास गर्नुपर्ने विषयमा लिडर्स मिटमा छलफल हुने बताइएको छ।
इक्यानमा हाल ७५० भन्दा बढी सदस्य संस्था आबद्ध रहेको र देशभर शाखा तथा समन्वय संरचना विस्तार भएको आयोजकले जनाएको छ। काठमाडौंमा केन्द्रित अन्तर्राष्ट्रिय शिक्षा क्षेत्रका गतिविधि, अनुभव र अवसरलाई प्रदेश, जिल्ला तथा देशका विभिन्न शैक्षिक बजारसँग जोड्दै विकेन्द्रीकृत संस्थागत नेतृत्व निर्माण गर्नु इक्यानको महत्वपूर्ण प्राथमिकता रहेको जनाइएको छ।
लिडर्स मिट ३.० मा ‘ग्लोबल एजुकेशन मोबिलिटी’ मा नेपालको भूमिका र स्थानबारे समेत व्यापक बहस हुने भएको छ। कार्यक्रममा छलफल तथा अन्तरक्रियाबाट प्राप्त निष्कर्षलाई समेटेर ‘झापा घोषणापत्र’ जारी गरिने आयोजकले जनाएको छ।
घोषणापत्रमार्फत ग्लोबल एजुकेसन मोबिलिटीमा नेपालको वर्तमान अवस्था, सम्भावना, चुनौती, राष्ट्रिय हित तथा आगामी दिशाबारे इक्यानको संस्थागत दृष्टिकोण प्रस्तुत गरिनेछ। विद्यार्थी हित, ईथिकल प्र्याक्टिस, इन्स्टिचुसनल एकाउन्टबिलिटी, इन्टरनेसनल पार्टनरसिप तथा पोलिसी इन्गेजमेन्ट लगायतका विषयलाई घोषणापत्रमा प्राथमिकता दिइने बताइएको छ।
लिडर्स मिटले केन्द्र र शाखाबीचको संस्थागत सम्बन्ध, समन्वय, सञ्चार तथा साझा रणनीतिक दिशालाई थप मजबुत बनाउने अपेक्षा गरिएको छ। सहभागी नेतृत्वले आ–आफ्ना क्षेत्र र संस्थामा देखिएका चुनौती, अनुभव तथा सफल अभ्यास आदानप्रदान गर्दै संस्थागत नेतृत्व क्षमता अभिवृद्धिमा योगदान पुर्‍याउने आयोजकको विश्वास छ।
राजधानीबाहिर आयोजना हुन लागेको लिडर्स मिटले अन्तर्राष्ट्रिय शिक्षा क्षेत्र काठमाडौंमा मात्र सीमित नभएको सन्देशसमेत दिने इक्यान झापाको भनाइ छ। झापामा राष्ट्रियस्तरको नेतृत्व संवाद आयोजना गर्दा पूर्वी नेपाललाई नेपालको अन्तर्राष्ट्रिय शिक्षा क्षेत्रको राष्ट्रिय नेटवर्कसँग थप मजबुत रूपमा जोड्न सहयोग पुग्ने अपेक्षा गरिएको छ।
कार्यक्रमका लागि सम्बन्धित सरोकारवालालाई निमन्त्रणा पठाइसकिएको आयोजकले जनाएको छ।
इक्यान झापा शाखाका अध्यक्ष राजकुमार कार्कीको अध्यक्षतामा सम्पन्न पत्रकार सम्मेलनमा इक्यान केन्द्रीय द्वितीय सचिव आशिक कार्की प्रमुख अतिथि रहेका थिए। कार्यक्रमको सञ्चालन इक्यान झापा शाखाका उपाध्यक्ष अशोक भण्डारीले गरेका थिए।
इक्यानका अनुसार लिडर्स मिट ३.० केवल नेतृत्वबीचको भेटघाटमा सीमित नभई नेतृत्व विकास, संस्थागत क्षमता अभिवृद्धि, सुशासन, साझा दृष्टिकोण र ग्लोबल एजुकेसन मोबिलिटीमा नेपालको रणनीतिक भूमिकालाई एउटै बहसमा जोड्ने राष्ट्रिय मञ्चका रूपमा अघि बढ्नेछ। ‘झापा घोषणापत्र’ सोही रणनीतिक यात्राको सार्वजनिक प्रतिबद्धताको दस्तावेजका रूपमा रहनेछ।