झापा । घरअगाडी खेल्दाखेल्दै अचानक हराएकी दुई बर्षीया बालिका बिन्दी मण्डल सकुशल फेला परेकीछन् । बाराको कलैया उपमहानगरपालिका १ कट्टीपर्साकी दुई वर्षीया बालिका मण्डल १२ घण्टापछि फेला परेकी हुन् ।

स्थानीय मुकेश मण्डलकी छोरी विन्दी शनिबार साँझ ५ः३० बजेतिर आफ्नै घरबाट बेपता भएकी थिइन् । घर अगाडि खेलिरहेकी बालिका अचानक बेपत्ता भएपछि बालिकाका हजुरबुबाले प्रहरीमा खबर गरेका थिए ।

बालिकालाई स्थानीयवासीले आइतबार बिहान ५ बजेतिर कलैया उपमहानगरपालिका २६ मा फेला पारेका थिए ।

सिसवा महेशपुरमा सडक किनारामा बालिकालाई रोइरहेको अवस्थामा देखेपछि स्थानीय महिला सल्मा नेशाले प्रहरीलाई जानकारी गराएकी थिइन् । आफ्नो घरभन्दा करिब एक किलोमिटर उत्तरतर्फ बालिका सकुशल फेला परेको जिल्ला प्रहरी कार्यालय बाराका प्रवक्ता डिएसपी मिनबहादुर घलेले जानकारी दिए ।

प्रहरीका अनुसार प्रहरी, परिवार र स्थानीयवासीले रातभरी बालिकाको खोजी गरेका थिए । डिएसपी घलेका अनुसार शनिवार साँझ बालिका हराएको विषयमा परिवारले जानकारी गराएपछि प्रहरीले सम्भावित स्थानहरुमा सर्च अभियान तीव्र बनाएको थियो ।

जिल्ला प्रहरी कार्यालय बाराका प्रहरी उपरिक्षक नरेन्द्र कुँवरको कमाण्डमा तालिमप्राप्त कुकुर सहितको सुरक्षा टोलीले रातभर बालिका खोजी अभियान चलाएको थियो । ‘बालिका पुग्न सक्ने सम्भावित स्थानहरुमा हामीले नेपाली सेना र सशस्त्र प्रहरी समेतको सहयोगमा रातभर सर्च अभियान चलाएका थियौं,’ डिएसपी घलेले भने ।

प्रहरीले उद्धार गरी ती बालिकाको स्वास्थ्य परीक्षण गर्न प्रादेशिक अस्पतालमा कलैयामा पठाएको थियो । उनको स्वास्थ्य अवस्था सामान्य रहेकाले सुरक्षित रुपमा परिवारको जिम्मा लगाइएको र घटनाको सम्बन्धमा अनुसन्धान भइरहेको जिल्ला प्रहरी कार्यालय बाराले जनाएको छ ।