विराटनगर । मोरङको धनपालथानस्थित उमागौरी सहकारी संस्थामा भएको ठगी प्रकरणमा सार्वजनिक लेखा समितिका सभापति ऋषिकेश पोखरेलकी श्रीमती अञ्जला कोइरालालाई १० लाख धरौटीमा छाड्ने जिल्ला अदालतको आदेश उच्च अदालतले उल्ट्याएको छ ।
सहकारीको २२ करोडभन्दा बढीको ठगी प्रकरणमा मुछिएकी एमाले सांसद पोखरेलकी पत्नी अञ्जलासहित चार प्रतिवादीलाई १ करोड धरौटी माग गर्ने आदेश उच्च अदालत विराटनगरले दिएको हो ।
उच्च अदालत विराटनगरका न्यायाधीश विष्णुप्रसाद अर्यालको एकल इजलासले बिहीबार सो आदेश सुनाएको हो । जिल्ला अदालतले सामान्य धरौटीमा छोड्ने निर्णय गरेका प्रतिवादीहरू अन्जला कोइराला, रोशन राजवंशी, सन्तलाल खवास र ज्योति बास्कोटाको हकमा उच्च अदालतले १–१ करोड रुपैयाँ धरौटी माग गरेको छ ।
यसअघि जिल्ला अदालतका न्यायाधीश उद्धवप्रसाद भट्टराईको इजलासले गत पुस २४ गते कोइरालालाई १० लाख, बाँस्कोटालाई ५ लाख, सुमन लोहनीलाई २ लाख र मनोजकुमार सोनीलाई १ लाख धरौटीमा छोडेको थियो । जिल्लाको सोही आदेशविरुद्ध सरकारी वकिलको कार्यालयले प्रतिवादीहरूलाई थुनामा राखेर अनुसन्धान गर्नुपर्ने मागसहित उच्च अदालतमा पुनरावेदन गरेको थियो ।
सहकारीका अध्यक्ष शम्भुप्रसाद रौनियार र पूर्व वडाध्यक्ष रोशन राजवंशीलाई पुर्पक्षको लागि थुनामा राख्ने आदेश जिल्लाको आदेश थियो । रोशनलाई पनि उच्च अदालतले १ करोड रुपैयाँ धरौटी माग गरेको छ भने अध्यक्ष रौनियारको हकमा जिल्लाको आदेशलाई सदर गरेको छ ।
यो मुद्दा उच्च अदालतमा पुगेपछि पनि यसको प्रक्रिया सहज थिएन । तीन महिनाको छोटो अवधिमा मुद्दाको पेशी १३ पटक स्थगित हुनु र एक पटक ‘हेर्न नमिल्ने’ सूचीमा परेको थियो । वैशाख ११ गते न्यायाधीशद्वय श्रीधराकुमारी पुडासैनी र केशवप्रसाद बास्तोलाको संयुक्त इजलासमा प्रतिवादीहरूलाई माग्ने धरौटी रकममा राय बाझिएपछि तेस्रो न्यायाधीशकोमा पेशी चढेको थियो ।
त्यसबेला न्यायाधीश बाँस्तोलाले अन्जलासहित चार जनासँग १–१ करोड धरौटी माग्नुपर्ने राय दिएका थिए भने न्यायाधीश पुडासैनीले जिल्लाकै आदेश सदर गर्ने लेखेकी थिइन् । राय बाझिएपछि पटक–पटक पेशी तोकेर स्थगित हुँदै न्यायाधीश विष्णुप्रसाद अर्यालको इजलासमा सुनुवाई भएको हो । उनले न्यायाधीश बास्तोलाको रायलाई सदर गरेका छन् ।
मोरङको धनपालथान गाउँपालिकामा सञ्चालित उमागौरी सहकारी संस्थाका ८ हजार ८४२ शेयर सदस्यको करोडौं रुपैयाँ हिनामिना भएको थियो । छानबिनका क्रममा सहकारीको कुल २२ करोड ४८ लाख २७ हजार रुपैयाँ अपचलन गरिएको पुष्टि भएपछि गत मंसिरमा अन्जलासहित २६ जनाविरुद्ध जिल्ला अदालत मोरङमा ठगी मुद्दा दायर गरिएको थियो ।
सहकारीको ठगी भएको समयमा अञ्जला कोइराला सहकारीको सञ्चालक समिति सदस्य थिइन् । सहकारीले लिएको ऋण नबुझाएपछि बुटवलस्थित आरएसडिसी लघुवित्तले उनीसहित सञ्चालकलाई कालोसुचीमा राखेको छ ।