बिर्तामोड । झापाको बिर्तामोडमा मुख्य कार्यालय रहेको हाम्रो नेपाल बचत तथा ऋण सहकारी संस्था लि. उत्कृष्ट घोषित भएको छ । साना किसान विकास लघुवित्त वित्तीय संस्था बबरमहल काठमाण्डौले हाम्रो नेपाल साकोसलाई उत्कृष्ट घोषणा गर्दै आइतबार प्रसंशापत्र प्रदान गरेको छ ।

देशभरका एक हजार सात सय साझेदार संस्था मध्ये हाम्रो नेपाल उत्कृष्ट भएको घोषणा सहित साना किसानको २४औँ साधारणसभामा हाम्रो नेपाललाई प्रसंशापत्र प्रदान गरिएको हो । पूर्वअर्थमन्त्री डा. युवराज खतिवडा, सो वित्तीय संस्थाका अध्यक्ष खेमबहादुर पाठक, कार्यकारी प्रमुख शिवरामप्रसाद कोइराला लगायतले हाम्रो नेपालका अध्यक्ष भवानीप्रसाद दङ्गाललाई संयुक्त रूपमा फूलमाला, खदा, अविरसहित प्रशंसापत्र हस्तान्तरण गरेका थिए ।

कारोबारको आधारमा उत्कृष्ट घोषणा भएको हाम्रो नेपालले वार्षिक अढाई अर्ब बढीको आर्थिक कारोबार गर्दै आएको उपाध्यक्ष राजेन्द्र गौतमले जानकारी दिएका छन् । झापा, मोरङ र इलाममा ३१ वटा सेवाकेन्द्र मार्फत सेवा प्रवाह गर्दै आएको हाम्रो नेपालको सेयर सदस्य ३८ हजार बढी छन् ।  १२ वर्ष अघिबाट सञ्चालनमा आएको हाम्रो नेपाललाई  २०८१ साउनदेखि ८२ जेठसम्मको कारोबारका आधारमा साना किसानले उत्कृष्ट व्यवसायिक साझेदार घोषणा गरेको हो ।