बिर्तामोड । घरेलु कामदारको रुपमा राखिएकी १६ वर्षीया नाबालिकालाई जबरजस्ती करणी गरेको आरोपमा पक्राउ परेका बिर्तामोड नगरपालिकाका पूर्व नगर प्रमुख ध्रुवकुमार शिवाकोटीसँग झापा जिल्ला अदालतमा आज बयान लिइएको छ ।

आज दिउँसो करिव ३ घण्टा शिवाकोटीसँग बयान लिइएको अदालत स्रोतले जनाएको छ । उनीविरुद्ध शुक्रवार झापा जिल्ला अदालतमा अभियोग पत्र दायर गरिएको थियो । आज बयान नसकिएकाले थुनछेक बहस हुन पाएन । भोलिदेखि बहस शुरु हुने जनाइएको छ । शिवाकोटीको पक्षमा अशोक पोखरेल, गजेन्द्र आचार्य, टंक उप्रेतीजस्ता कानुन व्यवसायीहरुले बहस गर्न लागेका छन् । शिवाकोटीको मुद्दा न्यायाधीश नवीनकुमार जोशीको ५ नं इजलासमा परेको छ ।

घरेलु कामदारको रूपमा राखिएकी नाबालिकालाई करणी गरेको आरोपमा प्रहरीले उनलाई पक्राउ परेकै दिनदेखि बीएण्डसी अस्पतालमा राखेको छ । स्वास्थ्यमा समस्या भएको देखिएपछि शिवाकोटीलाई अस्पतालमा भर्ना गरिएको थियो । प्रहरीले उनलाई गत मंसिर २४ गते पक्राउ गरेको थियो ।