बिर्तामोड । कैलालीको टीकापुर विमानस्थल २७ बर्षपछि पुनः सञ्चालनमा आएको छ । विमानस्थल आइतबारदेखि नियमित सञ्चालनमा आएको छ ।

आइतबार तारा एयरको वाइटी १७०१ नम्बरको ट्वीनअटर विमानमा चालक दलका तीनसहित ६ कर्मचारी र १२ यात्रु बोकेर दिउँसो १ः४४ बजे टीकापुर विमानस्थलमा अवतरण गरेको हो ।

पहिलो उडानमार्फत टीकापुर आइपुगेका संस्कृति, पर्यटन तथा नागरिक उड्डयन राज्यमन्त्री अरूणकुमार चौधरी लगायतलाई टीकापुर नगरपालिकाका प्रमुख रामलाल डगौरा, उद्योग वाणिज्य सङ्घ टीकापुरका उपाध्यक्ष कृष्ण बजगाइँ लगायतले स्वागत गरेका थिए ।

राज्यमन्त्री चौधरीले टीकापुर विमानस्थलको छिट्टै स्तरोन्नति गरी आगामी दिनमा काठमाण्डौ–टीकापुर सिधा हवाई उडान सञ्चालन गरिने बताए ।

‘गत निर्वाचनमा पनि मैले टीकापुर विमानस्थल सञ्चालनको प्रतिबद्धता जनाएको थिएँ, आजदेखि टीकापुर विमानस्थल नियमित सञ्चालनमा आएको छ, यसको निरन्तरताका लागि मेरो प्रयास रहनेछ,’ उनले भने ।

टीकापुर नगरपालिकाको पहलमा काठमाण्डौदेखि नेपालगञ्जसम्म यति एयरलाइन्समार्फत र नेपालगञ्जबाट ‘कनेक्टिङ फ्लाइट’ मार्फत टीकापुर विमानस्थलसम्म तारा एयरले उडान गर्ने गरी व्यवस्थापन गरिएको टीकापुरका नगरप्रमुख डगौरा थारूले बताए ।

विमानस्थलमा प्रत्येक साता आइतबार र बिहीबार काठमाण्डौ–नेपालगञ्ज–टीकापुर र टीकापुर–नेपालगञ्ज– काठमाण्डौ उडान हुनेछ।

टीकापुर नगरपालिका र तारा एयरबीच प्रत्येक उडानमा न्यूनतम १५ सिटको रकम सुनिश्चित गर्ने गरी सम्झौता भएको नगरप्रमुख डगौरा थारूले जानकारी दिए ।

‘यति एयरलाइन्सले काठमाण्डौ–नेपालगञ्ज र त्यहाँबाट कनेक्टिङ फ्लाइटमार्फत तारा एयरले नेपालगञ्ज–टीकापुर उडान भर्नेछ । यसका लागि एकमुष्ट काठमाण्डौ–टीकापुरको एकतर्फी भाडा नौ हजार रुपैँया निर्धारण गरिएको छ’, उनले भने ।