बिर्तामोड । नेपाल पत्रकार महासंघ झापा शाखाको अध्यक्षमा पुनः एकराज गिरी निर्वाचित भएका छन् । नेपाल प्रेस युनियन केन्द्रले राजेन्द्र गौतमलाई आधिकारिक उम्मेदवार बनाएपनि गिरी दोस्रो कार्यकालका लागि निर्वाचित भएका हुन् । प्रेस चौतारी नेपालसँग गठबन्धन बनाएर गिरीले निर्वाचन जितेका हुन् । 

गिरी १३१ मतसहित निर्वाचित हुँदा उनका प्रतिष्पर्धीहरु श्रमजीवी पत्रकारहरुको साझा प्यानलका उम्मेदवार डिकेश लामा र नेपाल प्रेस युनियनका आधिकारिक उम्मेदवार राजेन्द्र गौतमले ३४–३४ मत ल्याएका छन् भने स्वतन्त्र उम्मेदवार टीकाराम नेपाल नेतीले ४ मत पाएका छन् ।

त्यस्तै उपाध्यक्षमा युनियन–चौतारी गठबन्धनका सुब्रत न्यौपाने १२२ मतसहित निर्वाचित हुँदा उनका प्रतिष्पर्धी साझा प्यानलका गणेशमान मुखियाले ८१ मत प्राप्त गरेका छन् । महिला उपाध्यक्षमा साझा प्यानलकी विनिता गौतम (बिनिशा शर्मा)निर्वाचित भएकी छन् । उनले १०६ मत ल्याउँदा गठबन्धनकी सुशिला संग्रौलाले ८९ मत पाएकी छन् । सचिव पदमा भने गठबन्धनका प्रदीप परियार र साझा प्यानलका राजु पाठकले बराबरी मत ल्याएका छन् । परियार र पाठकले ९९–९९ मत ल्याएका हुन् । मत बराबर भएसँगै तीन बर्षे कार्यकालमा आधा–आधा काम गर्ने सहमति भएको छ ।

त्यस्तै सहसचिव (समावेशी)मा १११ मतसहित गठबन्धनका तिलक तामाङ योञ्जन निर्वाचित हुँदा उनका प्रतिष्पर्धी साझा प्यानलका चिरञ्जीवी घिमिरेले ८३ मत ल्याएका छन् । कोषाध्यक्षमा गठबन्धनका मुक्तिनाथ पौडेल ९९ मतसहित विजयी भएका छन् । उनका प्रतिष्पर्धीहरु साझा प्यानलका पुष्पलाल खड्काले ५४ र स्वतन्त्र उम्मेदवार शम्भुजित दाहालले ४६ मत प्राप्त गरेका छन् । खुल्ला सहसचिवमा भने यसअघि नै गठबन्धनका उम्मेदवार रमेश तिवारी निर्विरोध निर्वाचित भएका थिए ।

त्यस्तै खुल्ला सदस्यमा गठबन्धनकी अस्मिता साँखी १४८, इशा प्रधान १३५, स्वस्तिका आचार्य १३३, विनोद पाण्डे १३३, द्रोण अधिकारी १२८, सुदिप अधिकारी १२६, दिपेश राजवंशी ११७, देवेन्द्र प्रसाई ९५ र भूमिराज पराजुली ९४ मतसहित निर्वाचित भएका छन् ।

त्यस्तै महिला सदस्यमा साझा प्यानलकी भूकुमारी लिम्बू (भूमिका फियाक) निर्वाचित भएकी छन् । उनले ११२ मत ल्याउँदा उनका प्रतिष्पर्धी गठबन्धनकी उम्मेदवार सबिना लिम्बूले ७८ मत पाएकी छन् । त्यस्तै आदिवासी जनजाति सदस्यमा गठबन्धनकना इन्द्रबहादुर राई ११० मतसहित निर्वाचित हुँदा नरेश गुरुङले ७१ मत पाएका छन् ।

त्यस्तै मधेसी सदस्यमा साझा प्यानलका सन्तोष शर्मा १००मतसहित निर्वाचित हुँदा गठबन्धनका मनकुमार शर्माले ९१ मत ल्याएका छन् । दलित सदस्यमा गठबन्धनका तर्फबाट उम्मेदवार बनेका प्रेस चौतारी नेपाल झापाका अध्यक्ष मनकुमार गदाल निर्विरोध भएका थिए । त्यस्तै केन्द्रीय परिषद सदस्य खुल्लामा गठबन्धनका उम्मेदवारहरु विष्णु सुब्बा १०१ र अर्जुन कार्की ८९ मतसहित निर्वाचित भएका छन् । सो पदमा उम्मेद्वारी दिएका समाजवादी प्रेस संगठनका पर्वत पोर्तेलले ६४, साझा प्यानलका उम्मेदवारहरु होमप्रकाश अधिकारीले ५६, नेत्रविक्रम बिमलीले ३७ र कमन देवानले २८ मत ल्याएका छन् । यसअघि आदिवासी जनजाति र महिलामा क्रमशः गठबन्धनका उम्मेदवारहरु विशाल नेम्बाङ र लीला अनमोल निर्विरोध भएका थिए । १३ जना प्रदेश परिषद सदस्य पनि निर्विरोध भएका थिए ।