बिर्तामोड । झापास्थित बिएण्डसी मेडिकल कलेजका सञ्चालक दुर्गा प्रसाईं एक पछि अर्को कानुनी फन्दामा फसिरहेका छन् । विद्युतीय ऐन अन्तर्गत पक्राउ परेका प्रसाईंविरुद्ध आपराधिक लाभ सम्बन्धी कसुरमा पनि अदालतबाट पक्राउ पुर्जी जारी भएको हो ।

जिल्ला अदालत काठमाण्डौबाट उनीविरुद्ध आपराधिक लाभसम्बन्धी कसुरमा पक्राउ पुर्जी जारी भएको केन्द्रीय अनुसन्धान ब्युरो (सीआईबी)का एसपी होविन्द्र बोगटीले बताए । 

केन्द्रीय अनुसन्धान ब्युरोले उनलाई दोस्रो पटक मंसिर ४ गते पक्राउ गरेको थियो । भारतीय गुन्डा नाइके लरेन्स विश्नोइको नाममा नेपालका व्यवसायीलाई धम्क्याउने हरिचन्द्र फुयलले दुर्गा प्रसाईंलाई भ्वाइस रेकर्ड पठाउने गरेको भेटिएको छ । उनको बयानको आधारमा प्रसाईं पनि आपराधिक लाभ सम्बन्धी कसुरमा अनुसन्धानमा तानिएका हुन् ।

भारतबाट ह्वाट्स एप मार्फत धम्की दिएपछि सो कुराकानीको अडियो रेकर्ड उनले मेडिकल व्यवसायी प्रसाईंलाई पठाउने गरेको भेटिएको सीआईबीका एसपी  बोगटीले बताए । उनले भने, ‘व्यवसायीलाई धम्की दिएको अडियो प्रसाईंलाई पठाएको भेटिएको छ ।’

झापाको चारआली घर भएका फुयललाई प्रहरीले भारतको आसामबाट पक्राउ गरेर काठमाण्डौमा ल्याएर अनुसन्धान गरिरहेको छ । फुयलले भारतीय टेलिकम कम्पनी एयरटेलको दुई वटा सिम लिएर नेपालका व्यवसायीहरूलाई धम्की दिँदै आएका थिए ।

उनले ५ घण्टादेखि २४ घण्टासम्मको अल्टिमेटम दिएर व्यवसायी र बैंकरहरुलाई धम्की दिँदै प्रसाईं नेतृत्वको नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियानलाई सहयोग नगरे ‘सिध्याउँछु’  भन्ने गरेका थिए । सो रेकर्ड उनले प्रसाईंलाई पठाउँथे । प्रहरीले अडियो बरामद गरेको छ ।  उनले आफूलाई भारतीय गुन्डा नाइके ‘विश्नोई ग्याङबाट हुँ’ भन्ने गरेका थिए ।

प्रसाई पहिलो पटक विद्युतीय कारोबार ऐन अन्तर्गत असोज ६ गते पक्राउ परेका थिए । फेक डकुमेण्टको आधारमा सामाजिक सञ्जालमा प्रधानमन्त्री केपी ओली विरुद्ध कम्बोडीयामा लगानी रहेको भन्दै भ्रम सिर्जना गरेको आरोपमा दोस्रो पटक पक्राउ परेका प्रसाईंको अनुसन्धान जारी रहेको छ ।