बिर्तामोड । झापाको तीन अलग अलग स्थानमा आगलागी भएको छ । आगलागीबाट करिब १९ लाख बराबरको क्षति भएको अनुमान गरिएको प्रहरीले जनाएको छ ।

शनिबार साँझ करिब ६ः४५ बजे झापा गाउँपालिका वडा नम्बर ७ रमितेटोल बस्ने लुखी हस्दाको घरमा विद्युत लाईन सर्ट भई आगलागी हुँदा टिनको छानो र बाँसको टाटीले बनेको ३ कोठे घरमा रहेको सम्पुर्ण मालसामानहरु र नजिकै रहेको गोठ समेत पूर्ण रुपमा जलेर नष्ट हुँदा अन्दाजी २ लाख ५० हजार बराबरको क्षति भएको प्रहरीले जनाएको छ ।

त्यस्तै शनिबार राति अन्दाजी १० बजे अर्जुनधारा नगरपालिका वडा नम्बर ११ सालबारी स्थित ४७ बर्षीय भुमिनाथ बराल र अमर राउतको १ बिगाह धान काटि जम्मा गरी राखेको कुन्युमा आगलागी हुँदा अन्दाजी २ लाख १० हजार बराबरको क्षति भएको जिल्ला प्रहरी कार्यालय झापाका सूचना अधिकारी डीएसपी कृष्णकुमार चन्दले जानकारी दिए । बिर्तामोड, मेचीनगर र भद्रपुर नगरपालिकाको दमकलको सहयोगमा नेपाल प्रहरी र  स्थानीयबासीले आगो नियन्त्रणमा लिएका थिए ।

यता आइतबार विहानको राति १२ः१५ बजे दमक नगरपालिका वडा नम्बर १ रवि स्टेण्ड बस्ने शिव राईको अढाई तले घरको भुई तलामा किराना, कस्मेटिक र खाद्यान्न पसल गरी बस्ने बर्ष ४३ को राम किशोर साहको पसलमा करेन्ट सर्ट भई आगलागी हुँदा पसलमा रहेको सम्पुर्ण किराना सामान, कस्मेटिक सामान, खाद्यान्न सामान, झ्याल, ढोका, फ्रिज र अन्य सामान समेत जलेर नष्ट हुँदा करिब १५ लाख बराबरको क्षति भएको सूचना अधिकारी चन्दले जानकारी दिए ।