बिर्तामोड । कोशी प्रदेशका मुख्य सडकमा कुद्ने यात्रुबाहक बसको तीब्र गति न्यनीकरण गर्न आजदेखि टाइम कार्ड लागू गरिएको छ । पूर्व–पश्चिम राजमार्ग अन्तर्गत काँकरभिट्टा र मोरङको गछियामा आयेजित कार्यक्रममा टाइम कार्डको सुरुवात गरिएको हो ।

नेपाल प्रहरी राजमार्ग सुरक्षा तथा ट्रफिक व्यवस्थापन कार्यालय कोशीको आयोजना तथा नेपाल यातायात व्यवसायी राष्ट्रिय महासंघ कोशी प्रदेश र नेपाल यातायात स्वतन्त्र मजदुर संगठनको सहकार्यमा टाइम कार्ड सुरु गरिएको नेपाल यातायात स्वतन्त्र मजदुर संगठनका केन्द्रीय अध्यक्ष भीमज्वाला राईले जानकारी दिए । 

प्रदेशका १५ स्थानमा टाइम कार्ड रुजु गर्ने व्यवस्था गरिएको छ । एक ठाउँमा टाइम कार्ड लिएपछि अर्को स्थानसम्म पुग्न कम्तीमा पनि तोकिएको टाइम पूरा हुनुपर्छ । यसबाट गाडीमा ओभरस्पिडबाट सवारी दुर्घटना हुने सम्भावना न्युनीकरण हुने कोशी प्रदेश प्रहरी कार्यालयका प्रमुख डीआईजी चन्द्रकुबेर खापुङले बताए । 

यसै बिच चालकहरुले टाइमकार्ड लिँदै ९ बुँदे प्रतिबद्धता पत्रमा हस्ताक्षरसमेत गरेका हुन् । आफू जिम्मेवार सवारी चालक भएर यात्रुहरु र अन्य सडक प्रयोगकर्ताको सुरक्षा सुनिश्चित गर्ने, सदैब ट्राफिकसम्वन्धी प्रचलित कानून, नियम र सडक अनुशासनको पूर्ण पालना गर्ने, आफ्नो सवारीसाधनको महत्वपूर्ण पक्ष ब्रेक, टायर, लाइट आदिको नियमित निरीक्षण र मर्मत सम्भार गर्ने, थकान र निन्द्राले प्रभावित भएको अवस्थामा सवारीसाधन नचलाउने, लेन अनुशासनको पूर्ण रुपमा पालना गर्ने र निर्धारित गतिमा सवारी चलाउने, जेव्रा क्रसिङमा सदैव पैदल यात्रुलाई प्राथमिकता दिने , ओभरटेक गर्दा सुरक्षित स्थानमा दाहिने तर्फबाट गर्ने, सवारी चलाउँदा मोबाइल फोनलगायत ध्यान अन्यत्र मोडिने गतिविधि नगर्ने र मादक पदार्थ, लागूपदार्थलगायत कानूनले वर्जित गरेका वस्तुहरु सेवन नगर्ने उनीहरुले प्रतिबद्धता जनाएका हुन् ।

नेपाल यातायात व्यवसायी राष्ट्रिय महासंघ कोशीका अध्यक्ष सरोज श्रेष्ठले टाइमकार्ड सुरु भएपछि सवारी साधनले गर्ने उछिन पछिनको अन्त्य हुने बताए । नेपालमा प्रत्येक दिन सडक दुर्घटनामा परेर औसत ८ जनाको मृत्यु हुने गरेको तथ्यांक छ । गत वर्ष मात्रै २ हजार ८ सय ८० ले सडक दुर्घटनाबाट ज्यान गुमाएका थिए । 

टाइम कार्ड सुरु भएपछि धरानको तिनकुने, काँकडभिट्टा, विराटनगर बसपार्क, विर्तामोड, ताराबारी, केर्खा, बेलबारी, गछिया, इटहरी कलंकी चोक, पकली, कोशीकटान र भन्टाबारीमा ट्राफिक प्रहरी अधिकारीले टायमकार्ड चेकजाँच गर्ने गरी क्याडलक तयार गरिएको कोशी प्रदेश ट्राफिक प्रहरी प्रमुख एसपी विनोद घिमिरेले बताए ।