बिर्तामोड । रोटरी क्लब बिर्तामोडका अध्यक्ष तथा सफल व्यवसायी सुरेशकुमार अग्रवाल (भद्रपुरे) र श्रीमती माया अग्रवालले बिर्तामोड–८ मा बस्दै आएकी दुर्गा बास्केलाई कृतिम हात लगाउन सहयोग गर्ने घोषणा गरेका छन् । शनिबार ४४औं वैवाहिक वर्षगाँठ मनाउन बास्के आश्रित बिर्तामोड–८ प्याकुरेल चोकस्थित सन्थाल बस्ती पुगेका अग्रवाल दम्पतिले बास्केको दाँया हात (कृतिम) लगाउन सहयोग गर्ने घोषणा गरेका हुन् ।

गरामनीस्थित दुर्गा माध्यमिक विद्यालयमा कक्षा आठमा अध्ययनरत दुर्गाको दायाँ हात अपाङ्ग रहेको र उनको उक्त हातलाई कृत्रिम हात निर्माण गरीदिने उद्देश्यका साथ अग्रवाल दम्पतिले बास्केको घरैमा गएका हुन् । उनीहरुले वैवाहिक वर्षगाँठको अवसरमा बास्के परिवारलाई विभिन्न उपहारहरू समेत प्रदान गरेका थिए । अध्यक्ष अग्रवालले ती बालिकालाई झापाबाट बीरगंज अस्पतालसम्म जाने आउने र खानेबस्नेको समेत प्रबन्ध गरिदिने घोषणा गरेका छन् । रोटरी क्लबको संयोजनमा ती बालिकाको हातको उपचार गर्ने प्रबन्ध मिलाइएको अग्रवालले बताए ।

बालिकाको हातको उपचार गरिदिने घोषणा गरेपछि बास्के परिवारमा खुसी छाएको छ । दुर्गाकि आमाको निधन भएपछि बाबु समेत भारतमा काम गर्न गएकाले उनी मावलामा बस्दै आएकी छिन् ।

सो अवसरमा उपस्थित मानिसहरुलाई अग्रवाल दम्पतिले मिठाई, बिस्कुट, चाउचाउ लगायतका सामग्रीहरु उपहार स्वरूप दिएका थिए । बास्के परिवारलाई एक बोरा चामल, पानी तताउने इलेक्ट्रिक जग र बालिकालाई १ सेट ट्राउजरसमेत उनीहरुले प्रदान गरेका थिए । अग्रवालले हरेक वर्ष जन्मदिन वा वैवाहिक वर्षगाँठको अवसर पारेर सामाजिक कार्य गर्दै आएका छन् ।