झापा । भक्तपुरस्थित दुर्गा प्रसाईंको घरबाट पक्राउ गरिएका उनका ९ जना समर्थकलाई प्रहरीले मुद्दा चलाउने भएको छ । प्रसाईं नेतृत्वको राष्ट्र, राष्ट्रियता, धर्म, संस्कृति र नागरिक बचाउ महाअभियानमा आबद्ध उनीहरुलाई मुद्दा चलाउने निर्णय गरिएको सीआईबीका एसपी होविन्द्र बोगटीले बताए ।

पक्राउ पर्नेमा देवी सङ्ग्रौला, बलबहादुर तामाङ, माधव पौड्याल, ओमप्रकाश लुइँटेल, सुदिप नेपाल, राजु रानाभाट, विश्वास सुवेदी, तुलसी बराइली र रमेश ठकुरी छन् । उनीहरूलाई मुलुकी अपराध संहिता–२०७४ अन्तर्गत अभद्र व्यवहार सम्बन्धी कसुरमा म्याद लिएर जिल्ला प्रहरी परिसर भक्तपुरको हिरासतमा राखिएको छ । आरोपीहरू विरुद्ध भक्तपुर जिल्ला अदालतबाट ५ दिनको म्याद लिइएको जिल्ला प्रहरी परिसर भक्तपुरका डीएसपी ढुण्डीराज न्यौपानेले जानकारी दिए ।

मङ्सिर ७ मा प्रसाईं नेतृत्वको समूहले काठमाण्डौमा प्रदर्शन गर्ने तयारी गरेको छ । भड्काउपूर्ण आन्दोलन गर्न सक्ने आशंकमा प्रहरीले उनीहरूलाई पक्राउ गरेको हो । तर, प्रहरीले उनीहरूलाई प्रसाईंलाई पक्राउ गर्न खोज्दा प्रहरीको काममा अवरोध सिर्जना गरेको आरोप लगाएको छ । प्रधानमन्त्री केपी शर्मा ओली विरुद्ध दुष्प्रचार गरेको आरोपमा प्रसाईलाई सीआईबीले मङ्सिर ४ मा पक्राउ गरेको थियो ।