बिर्तामोड । नक्कली भुटानी शरणार्थी प्रकरणमा पक्राउ परेका शरणार्थी नेता टेकनाथ रिजाल पुर्पक्षका लागि कारागार चलान भएका छन् । जेठ ४ गते पक्राउ परेका नेता रिजालसहित १८ जना विरुद्ध परेको मुद्दामा शुक्रबार भएको थुनछेक बहसपछि उनलाई पुर्पक्षका लागि थुनामा पठाइएको हो ।

रिजाललाई थुनामा राख्न न्यायाधीशले चारवटा आधारलाई तत्काल प्राप्त प्रमाण मानेका छन् । झापास्थित आफ्नो घरमा रङ लगाउने ठेक्का लिएका रामशरण केसीसँग रिजालले ‘अब नेपालीलाई भुटानी शरणार्थी बनाई अमेरिका लैजाने काम हुन्छ’ भनेको तथ्यलाई न्यायाधीशले उनी विरुद्धको प्रमाणको रूपमा ब्याख्या गरेका छन् ।

रामशरण केसीको बयान समेतलाई जिल्ला अदालत काठमाडौँका न्यायाधीश प्रेमप्रसाद न्यौपानेले प्रमाण मानेर थुनामा पठाउने आदेश गरेका हुन् ।

रामशरणले बयानमा भनेका छन्– ‘टेकनाथ रिजालले ३४ जना नेपालीहरूलाई भुटानी शरणार्थीको परिचयपत्र ‘भुटान मानवअधिकार सङ्गठन’को सदस्यता पत्रमा हस्ताक्षर गरेका हुन् ।’

शरणार्थी नेता रिजालका लागी आफ्नै बयान ‘घातक’ भएको छ । रामशरण केसीको बयानलाई रिजालले स्वीकार गरेको न्यायाधीशले आदेशमा उल्लेख गरेका छन् । आदेशमा भनिएको छ– ‘केही परिचयपत्रमा सही गरेको तथ्य निजले नै स्वीकार गरेको देखिएको ।’

अनुसन्धान अधिकृत र सरकारी वकिलसँग गरेको बयानमा केसीले रिजाललाई ११ लाख नगद दिएको बयान दिएका थिए । रामशरणले गरेको सो बयान सानु भण्डारीबाट बरामद डायरीमा पनि उल्लेखित ब्यहोराले पुष्टि गरेको अदालतको ठहर छ । न्यायाधीश न्यौपानेले आदेशमा भनेका छन्– ‘रामशरण केसीको बयानलाई सानु भण्डारीबाट बरामद भएको डायरीमा उल्लेखित ब्यहोराले पुष्टि गरेको देखिँदा निजको कसुरमा संलग्नता रहेको देखियो ।’

रिजाल झापामा बसेर लामो समयदेखि भुटानी शरणार्थीहरुको स्वदेश फिर्तीको माग गर्दै आएका थिए । उनलाई नेपाल सरकारले उच्च नेताको दर्जामा राखेर मासिक एक लाख रुपैँया र सवारी साधन उपलब्ध गराउँदै आएको थियो ।