बिर्तामोड । बिर्तामोड–अर्जुनधारा सडक निर्माण सम्झौताको आधा समय सकिसक्दा काम भने पाँच प्रतिशत मात्र सम्पन्न भएको छ । दुई बर्षमा निर्माण सम्पन्न गर्ने गरि गत बर्ष जेठ ९ गते सम्झौता भएको उक्त सडकखण्डको काम पाँच प्रतिशत मात्र सम्पन्न भएको हो ।

भ्याटसहित १५ करोड ८२ लाख ७७ हजार १९९ रुपैंयाँमा ‘प्रविण–मैनाचुली–शान्ति जेभी’ले २०७९ जेठ ९ गते दुई बर्षमा निर्माण सम्पन्न गर्ने गरि सम्झौता गरेका थिए । निर्माण शुरु भएको आधा समय सकिँदापनि काम भने पाँच प्रतिशत मात्र सकिएको छ ।

ठेकेदार कम्पनी ‘प्रविण–मैनाचुली–शान्ति जेभी’ ले काम गर्न आलटाल गर्दा समयमा सडक निर्माण हुन नसक्ने आशंका बढेको छ । एक बर्षको अवधिमा ठेकेदार संस्थाले लिएको पेश्की रकम ५ प्रतिशत बराबरको समेत काम नगर्दा दोस्रो पटकको पेश्की रकम निकासा गर्न समस्या भएको सडक डिभिजन कार्यालय दमकका इन्जिनियर उज्वल खतिवडाले बताए । सभ्झौताको हिसाबले आधा काम सकिनु  पर्ने भएपनि हालसम्म पाँच प्रतिशतमात्र काम सम्पन्न भएको खतिवडा बताउँछन् ।

आयोजनास्थलमा सूचना पार्टीसमेत नराखी काम गर्दा यसको पारदर्शितामाथि समेत प्रश्न उठ्न थालेको छ । सूचना पार्टी निर्माणका लागि छुट्टै बजेट व्यवस्थापन भएपनि निर्माण कम्पनीले सूचना पार्टी राखेको छैन । आयोजना परिसरमा सबैले देख्ने गरी सूचना पाटी राख्नु पर्ने इन्जिनियर खतिवडाले बताए ।

भौतिक पुर्वाधार तथा यातायात ब्यवस्था मन्त्रालयबाट प्राप्त बजेटले उक्त सडक २०८१ जेठमा निर्माण गरिसक्नुपर्ने सम्झौतामा उल्लेख छ । सम्झौता गर्ने र काममा ढिलासुस्ती गर्ने निर्माण कम्पनीको गैर जिम्मेवारीले यात्रु तथा आसपासका बासिन्दा दैनिक कष्ट व्यहोरिरहेका छन् ।

बिर्तामोडको टाटा सोरुमबाट शुरु हुने सो सडक कप्तानबारी हुँदै सालबारी झिलसम्म ६ दशमलव १ किलोमिटरको निर्माण हुने छ । एकबर्ष बितिसक्दा २० मिटरको ड्रेनमात्र निर्माण भएको खतिवडाले जानकारी दिए । ‘हामीले काम ढिलो भयो भनेर निर्माण पक्षलाई पटक–पटक पत्र काटेका छौैं, खतिवडाले भने, ‘तीनवटा निर्माण कम्पनिमध्ये अरु दुईवटालाई तपाईको फर्म कालोसुचीमा जाने अवस्था छ भनेर भनेका छौं, अब पनि काम यही गतिमा भए दोस्रो किस्ता रकम निकासा गर्दैनौं ।’ रकम रोक्का गरेर फर्मलाई कारवाही गर्ने प्रक्रिया अघि बढाउनेसमेत खतिवडाले बताए ।

ठेकेदार कम्पनीका अनिल भट्टराईले समयमा काम सक्न प्रतिबद्ध रहेको बताए । ‘काम केही ढिलो भएको हो, दुई स्थानबाट कामलाई अघि बढाएका छौं, भट्टराईले भने, ‘समयमा निर्माण गरेर हस्तान्तरण गर्ने कुरामा हामी प्रतिबद्ध छौं ।’ भट्टराईले सुचना पाटी नराखेकोमा गल्ती भएको भन्दै अब छिट्टै त्यो आयोजना बारेको बिस्तृत जानकारी सहितको सुचना पाटी बनाएर राख्ने बताए ।

उनले यात्रुले दुख पाएको भन्दै असोजसम्ममा बिर्तामोडदेखि कप्तानबारीसम्मको तीन किलोमिटर सडकमा भने कालोपत्रे गरिने जानकारी दिए । खासगरी निर्माण मजदुरको अभावका कारण मानिसले गर्ने काममा सोचेजति प्रगति गर्न नसकिएको उनले बताए । विद्युत प्रधिकरणले पोल सार्न ढिलाई गरेकाले निर्माणको काम प्रभावित भएको उनको भनाई छ ।