बिर्तामोड । ऐतिहासिक, धार्मिक तथा पर्यटकीय स्थल विराटपोखरको व्युटिफिकेसनमा स्थानीयको सक्रियता बढ्दै गएको छ । बिर्तामोड नगरपालिका ३ स्थित विराटपोखर क्षेत्रको सौन्दर्य बढाउन स्थानीयबासी तथा सरोकारवाला संघसंस्था लागिपरेका हुन् ।

विराट पोखरी सरोवर बहुउद्धेश्यीय विकास समितिले पोखरी वरपर रहेका बोटविरुवामा रंगरोगन गरेको छ । सो क्षेत्रको आकर्षण बढाउन रंग लगाइएको विकास समितिका सचिव जगन्नाथ भट्टराईले जानकारी दिए । पाठक हार्डवेयरका सञ्चालक जय पाठकले पचास हजार रुपैँया मूल्य बराबरको रंग उपलब्ध गराएका थिए । यता मन्दिरका लागि माधव झाले रंग उपलब्ध गराएको भट्टराईले जानकारी दिए ।

सो क्षेत्रको विकासमा सहयोग गर्ने उद्धेश्यले दिपेन चौधरीले १० हजार, रुद्र चुडालले ८ हजार, सन्तोष उप्रेतीले ७ हजार, सागर उप्रेतीले ५ हजार, सन्तोष राउतले २ हजार एक सय, मेघराज बास्तोलाले २ हजार, विकास पराजुलीले १ हजार पचपन्न, गणेश मैनालीले १ हजार रुपैँया सहयोग गरेको विकास समितिका सचिव भट्टराईले जानकारी दिए । 

विराट पोखर सामाजिक युवा समाज, एमकेके ग्रुप, नेप्लिज टिन्स, बिर्तामोड सरसफाई अभियानलगायत विभिन्न संघसंस्थाको सहभागिता रंगरोगन तथा सरसफाई गरिएको छ ।

‘आन्तरिक तथा बाह्य पर्यटक आकर्षित गर्न र यस ठाउँको विकास र धार्मिक धरोहरलाई कायम गर्न समिति सदैव क्रियाशिल छ,’ सचिव भट्टराईले भने ।

उनका अनुसार विभिन्न भजनकिर्तन मण्डलीको सहभागितामा शिवरात्रीको दिन भजनकिर्तन तथा सांगितिक साँझसमेत सम्पन्न गरिएको छ ।