काठमाण्डौ । उपप्रधानमन्त्री एवं ऊर्जा जलस्रोत तथा सिंचाइ मन्त्री राजेन्द्र लिङ्देन र नेपालका लागि अष्ट्रेलियाका राजदूत फेलिसिटी जाने भोल्कबिच शिष्टाचार भेटवार्ता भएको छ । ऊर्जा जलस्रोत तथा सिंचाइ मन्त्रालयमा मंगलवार उनीहरुबीच भेटवार्ता भएको उपप्रधानमन्त्रीको सचिवालयले जनाएको छ ।

भेटमा द्विपक्षीय हित तथा पारस्परिक सम्बन्धका विषयमा विचार विमर्श हुनुका साथै कमला नदी स्टेट अफ दी बेसिन प्लानको विविध विषयमा छलफल भएको थियो ।

कमला नदी स्टेट अफ दी बेसिन प्लान जलस्रोत व्यवस्थापनमा नमुना योग्य कार्य हुने वताउदै राजदुत जाने भोल्कले जल तथा उर्जा क्षेत्रमा नेपाल र अष्ट्रेलियाबीचको यो सम्झौता अविष्मरणीय रहेको बताए ।

नेपाल र अष्ट्रेलियाबिच छ दशक लामो कुटनीतिक सम्वन्ध रहेको चर्चा गर्दे उपप्रधानमन्त्री लिङ्देनले कमला नदी बेसिनले कृषि क्षेत्र, त्यहाँका बासिन्दाको आर्थिक स्तरोन्नति र चुरेको क्षेत्रमा व्यवस्थापन गर्ने वताए ।

जलस्रोत व्यवस्थापनमा सहकार्य गर्नका लागि नेपालको ऊर्जा, जलस्रोत तथा सिँचाइ मन्त्रालय र अष्ट्रेलियाको ‘कमनवेल्थ साइन्टिफिक एन्ड इन्डस्ट्रियल रिसर्च अर्गनाइजेसन’बीच सन् २०१७ मा समझादारी भएको थियो । सो सम्झौताअनुसार कमनवेल्थ साइन्टिफिक एन्ड इन्डस्ट्रियल रिसर्च अर्गनाइजेसन र जल तथा ऊर्जा आयोगको सविचालयको साझेदारीमा कमला बेसिनको अवस्थाबारे अध्ययन गरी रणनीति बनाएर कार्यान्वयनमा लगिएको छ ।

कमला नदीको पानीलाई व्यवस्थित रुपले प्रयोग गर्ने र चुरे दोहन रोक्ने लगायतका कार्यमा कमला नदी स्टेट अफ दी बेसिन प्लान कार्यान्वयनको चरणमा रहेको छ ।

नेपाल–अस्ष्ट्रेलिया साझेदारीलाई थप सुदृढ बनाउन राजदुतले निर्वाह गरेको भूमिकाको प्रशंसा गर्दै उपप्रधानमन्त्री लिङ्देनले नेपालको आर्थिक तथा सामाजिक विकासमा अष्ट्रेलियाले पुर्याएको सहयोगप्रति धन्यवाद व्यक्त गरे ।

फरक प्रसंगमा उपप्रधानमन्त्री लिङ्देनले पचास हजार वढी विद्यार्थी अष्ट्रेलियामा अध्यनरत रहेको चर्चा गर्दै उनीहरुले लैजाने सामानको क्वारेन्टाइन र अन्य समस्यामा सकारात्मक भुमिका खेल्दिन आग्रह गरेका थिए ।