बिर्तामोड । इलाम–झापा मैत्री समाजले अपाङ्गता भएका बालबालिकालाई नगद तथा खाद्यान्न सहयोग गरेको छ । अर्जुनधारा नगरपालिकास्थित कप्तानबारीमा रहेको अपाङ्ग बाल शिक्षा सरोकार केन्द्रलाई  मैत्री समाजले आइतबार नगद तथा खाद्यान्न सहयोग गरेको हो ।

मैत्री समाजको बिर्तामोड नगर समितिले आफ्नो नियमित गतिविधी अन्तर्गत सरोकार केन्द्रलाई सहयोग गरेको समाजका बिर्तामोड नगर सचिव मिलन कोइरालाले जानकारी दिए । उनका अनुसार खानेतेल, दाल, नुन, चिउरा, चिनी, बिस्कुट, साबुन, चाउचाउ सेनेटरी प्याड लगायत खाजा तथा दैनिक भान्सामा आवश्यक सामाग्री उपलब्ध गराइएको थियो । समाजले खाद्यान्नसँगै ग्यास सिलिण्डर भर्न दुई हजार रुपैँया नगदसमेत सहयोग गरिएको अध्यक्ष अञ्जु लामिछानेले जानकारी दिइन् ।

सहयोग हस्तान्तरण कार्यक्रममा बोल्दै अपाङ्ग बाल शिक्षा सरोकार केन्द्रका संस्थापक अध्यक्ष कृष्ण दुलालले खुसी व्यक्त गर्दै सहयोग निरन्तरताका लागि आग्रह गरे । यस्ता किसिमका सहयोगले संस्था सञ्चालनमा सहयोग पुग्नुका साथै बालबालिकाको मन हर्षित हुने उनले बताए । केन्द्रमा इलाम र झापाका ९ जना अपाङ्ग बालबालिकाहरु रहेका छन् ।

कार्यक्रममा अध्यक्ष लामिछाने, निवर्तमान अध्यक्ष तिलोत्तमा खत्रीलगायतले मन्तव्य राखेका थिए । कार्यक्रममा नगर समितिका पदाधिकारी तथा सदस्यहरु, पूर्व सचिव दिनेश भट्टराई, पूर्व सदस्य सागर रिजाललगायत आजिवन सदस्यहरुको उपस्थिती रहेको थियो ।