काठमाण्डौ । सरकारले आत्मदाह गरेका इलामका प्रेमप्रसाद आचार्यले उठाएका विषयमा छानबिन गर्ने निर्णय गरेको छ ।

मन्त्रिपरिषद्को बुधबार बसेको बैठकले यसबारे छानबिन गर्न गृह मन्त्रालयलाई जिम्मा दिएको छ । ‘उहाँले उठान गरेको विषय अध्ययन गरेर गृह मन्त्रालयले छानबिन गर्ने र सत्य तथ्य बाहिर आएपछि सरकारले आवश्यक कदम चाल्ने निर्णय भएको छ’ उपप्रधानमन्त्री तथा गृहमन्त्री रवि लामिछानेले भने ।

उनले गृह मन्त्रालयले छानबिनको काम आज नै अघि बढाउने पनि बताए ।

आचार्यले मंगलबार नयाँ बानेश्वरमा आफ्नै शरीरमा आगो लगाएका थिए । उनको उपचारका क्रममा बुधबार विहान मृत्यु भएको थियो । उनले मृत्यु हुनुअघि फेसबुकमा लामो स्टाटस लेख्दै केही विषयमा छानबिन गर्नुपर्ने बताएका थिए । सरकारले सोही विषयमा छानबिन गर्न लागेको हो ।

गृहमन्त्री लामिछानेले बुधबार नै आचार्यको परिवारसँग भेटेर उनले उठाएका विषयमा छानबिन गर्ने प्रतिवद्धता जनाएका थिए ।

आचार्यले आफूले व्यवसाय गर्दा अनेकन् समस्याहरु भोग्नु परेको जसका कारण आफू मृत्यु रोज्न बाध्य भएको भन्दै सामाजिक सञ्जालमा लेखेर मंगलबार नयाँ बानेश्वरस्थित संसद भवन अगाडी आत्मदाह प्रयास गरेका थिए । उनको उपचारको क्रममा वुधबार विहान मृत्यु भएको छ ।