बिर्तामोड । झापाको बिर्तामोड ५ स्थित गणपति लाइन पछिल्लो समय क्याफे हबको रुपमा विकास भइरहेको छ । सो क्षेत्रमा शुक्रबारबाट ‘लयना बिस्ट्रो’ले औपचारिक सेवा शुभारम्भ गरेको छ ।

झापाका युवा व्यवसायीहरु रिशब मित्तल, छेवाङ शेर्पा र संजोग लिम्बूले बिस्ट्रो सञ्चालनमा ल्याएका हुन् । बिस्ट्रोले थाइ र चाइनिज खानालाई उद्घाटनको अवसरमा ग्राहक सामु पस्कने सञ्चालक छेवाङ शेर्पाले जानकारी दिए । ग्राहकको चाहना अनुसार खानाका अन्य परिकार थपिँदै लैजाने उनले बताए । विशेषगरि युवा र पर्यटकलाई लक्षित गरि बिस्ट्रो सञ्चालनमा ल्याइएको उनको भनाई छ ।

बिस्ट्रोमा इलामको कफि प्रयोग गरिने शेर्पाले जानकारी दिए । शहरको कोलाहलबाट केहि क्षण भएपनि मुक्ति चाहने ग्राहकको चाहनालाई मध्यनजर गरी उक्त क्षेत्र रोजिएको सञ्चालकको भनाई छ ।

इलामको ढुङ्गाबाट कलात्मक रुपमा बिस्ट्रो निर्माण गरिएको छ । सञ्चालक शेर्पाका अनुसार भवन निर्माणमा स्थानीय निर्माण सामाग्री र जनशक्ति प्रयोग गरिएको छ । करिब १ करोड ५० लाखको लागतमा बिस्ट्रो सञ्चालनमा ल्याइएको शेर्पाले बताए ।