बिर्तामोड । मंसिर ४ को निर्वाचनमा एउटै परिवारका तीन जना मतदान अधिकृतको रुपमा खटिएका छन् । चितवनका नारायण काफ्ले, उनकी श्रीमती सिता दाहाल र छोरी सिमृन काफ्ले निर्वाचनमा खटिएका हुन ।

बुवा नारायण प्रसाद काफ्ले (लेखा अधिकृत) लाई नवलपुर जिल्लामा मतदान अधिकृत र छोरी सिमृन काफ्लेलाई कास्की जिल्ला क्षेत्र नम्बर १ को पोखरा महानगरपालिकामा मतदान अधिकृतको रुपमा सरकारले खटाएको हो ।  आमा सिता दाहाल (परिवार नियोजन अधिकृत) लाई चितवन क्षेत्र नम्बर १ को कालिका नगरपालिकामा हुने प्रदेश सभाको निर्वाचनमा सहायक मतदान अधिकृतको रुपमा सरकारले खटाएको छ ।

‘हामी दुवैजनालाई निर्वाचनमा खटाईन्छ भन्ने सोचेका थिएनौँ । झन् छोरी पनि सँगसँगै खटिँदा हामीलाई यो ठूलो अवसर र  खुसीको क्षण हो भन्ने लागेको छ,’ नारायणले काफ्लेले भने ।

सिमृन गण्डकी प्रदेशको स्वास्थ्य आपूर्ति व्यवस्थापन केन्द्र अन्तर्गतको खरिद, योजना तथा अनुगमन शाखा प्रमुखको रुपमा कार्यरत छिन् । यसअघि स्वास्थ्य तथा जनसंख्या मन्त्रालयको नीति योजना तथा अनुगमन महाशाखामा जनस्वास्थ्य अधिकृतको रुपमा कार्यरत थिइन् ।

उनले भनिन्, ‘नियुक्ति पत्र आउने बित्तिकै हामी तीन जना फिल्डमा खटिएका हौँ। यो हाम्रो लागि ठूलो अवसर हो ।’