बिर्तामोड । नेकपा एमालेका अध्यक्ष केपी शर्मा ओली पूर्व राष्ट्रपति विद्यादेवि भण्डारीसँग तर्सिएको स्पष्ट देख्न सकिन्छ । अध्यक्ष नछाड्ने दाउमा रहेका ओली भण्डारीको सक्रियताले तर्सिएर सार्वजनिक अभिव्यक्ति नै दिन थालेका छन् । अनेरास्ववियुको २४औं महाधिवेशनलाई सम्बोधन गर्दै अध्यक्ष ओलीले महाधिवेशनको घोषणा नहुँदै फलानो आउने रे भनेर हल्ला चलाउने षड्यन्त्र भइरहेको बताएका हुन् ।

ओलीले भने, ‘अहिले हल्ला चलको छ, तल तल यो ग्रुप भनेका छन्, त्यो ग्रुप भनेका छन् । यसको कुनै आवश्यकता छैन । अर्को खेल हुन खोजेको छ यहाँ, फलानो आउने रे, यस्तो उस्तो । पार्टीमा कुनै छलफल भएको छैन, को अध्यक्ष को उपाध्यक्ष । महाधिवेशन घोषणा भएको छैन । बाहिर बाहिर हल्ला चलाएर पार्टीलाई कमजोर पार्न खोज्ने, पार्टी कार्यकर्ताको मनस्थिति बिथोल्न खोज्नेलाई निस्तेज पार्नुस् । स्टाटस सिस्टाटसलाई जवाफ दिनुस् ।’

अध्यक्ष ओलीले पार्टीमा विभिन्न नेता वा समूहका नामका गुट स्वीकार्य नहुने चेतावनी दिएका छन् ।

अध्यक्ष ओलीले पार्टीको कुरा बाहिर गएर फेसबुकबाट वा अन्तर्वार्ताबाट पार्टीलाई खुइल्याउने काम भए बाह्य हमलाको रुपमा लिएर जवाफ दिने बताए ।

उनले बाहिर गएर पार्टीमा ढुंगा हानेपछि आन्तरिक मामिला नहुने चेतावनी दिए । यस्ता कुरा सहँदा हैरान भएको भन्दै ओलीले भीम रावलले यसैगरी वर्षौंसम्म बाहिरबाट ढुंगा हानेको बताए ।

अध्यक्ष ओलीले चीनका राष्ट्रपति सी जिनपिङको उदाहरण दिँदै ७० बर्षे उमेर हद फेल खाएको बताए । उनले एमालेमा पनि उमेर हद फेल खाएको स्पष्ट पारे । उनको यो अभिव्यक्तिले उनी अध्यक्ष पद नछाड्ने मुडमा रहेको स्पष्ट पार्दछ ।

यता एमाले पूर्व उपाध्यक्ष समेत भइसकेकी भण्डारीलाई केहि दिन अघि चीनले निमन्त्रणा गरेर महत्व दिएको संकेत गरेको छ । भण्डारी पूर्वमा नेता भेटघाटमा सक्रिय छिन् ।