झापा । एमालेका सांसद चन्द्रबहादुर विश्वकर्माले नीति तथा कार्यक्रमको मौन विरोध गरेका छन् । प्रधानमन्त्री एवं संसदीय दलका नेता केपी शर्मा ओलीको निर्देशन उल्लंघन गर्दै विश्वकर्माले नीति तथा कार्यक्रमप्रति मौन टिप्पणी गरेका हुन् ।

वैशाख १९ गते सरकारका तर्फबाट राष्ट्रपति रामचन्द्र पौडेलले आर्थिक वर्ष २०८२/८३ का लागि नीति तथा कार्यक्रम प्रस्तुत गरेका थिए । नीति कार्यक्रमको छलफल सुरु हुुनुअघि आयोजित संसदीय दलको बैठकमा ओलीले एमाले सरकारले गलत नीति तथा कार्यक्रम नल्याउने भन्दै सांसदहरुलाई समर्थनमा बोल्न निर्देशन दिएका थिए । तर विश्वकर्माले शुक्रबार छलफलमा भाग लिँदै आफ्नो मौन टिप्पणी रहेको भन्दै भद्र विरोध जनाएका हुन् ।

उनले आफूले बोल्न पाएको समय मौन उभिएर विरोध जनाए ।

मौन टिप्पणी सुरु गर्नुअघि विश्वकर्माले रोष्ट्रमबाट भनेका थिए, ‘वैशाख १९ गते यस गरिमामय सदनमा आर्थिक वर्ष २०८२/८३ का लागि राष्ट्रपतिले नीति तथा कार्यक्रम सम्बोधन गर्नुभएको थियो । त्यसपछि यस गरिमामय संसदमा आफ्नो क्रिया प्रतिक्रियाहरु आएका छन् । छलफल भइरहेको छ । मैंले पनि प्रतिक्रिया दिनका लागि यहाँ उपस्थित भएको छु  । त्यसैले म प्रतिक्रिया दिन चाहन्छु......।’

विश्वकर्मा नेकपा एकताका क्रममा माओवादी हुँदै एमाले भएका हुन् । एमाले र माओवादीको एकता सर्वोच्चले भंग गरेपछि उनी एमालेतिर लागेका थिए । विश्वकर्मा एमालेका समानुपातिक तर्फका सांसद हुन् ।