बिर्तामोड । नेकपा एमालेका अध्यक्ष तथा प्रधानमन्त्री केपी शर्मा ओलीले राजावादीहरुप्रति आक्रोश व्यक्त गरेका छन् । राजावादीहरुको विरुद्धमा झापाको दमकमा आज आयोजित पार्टीको जनजागरण सभालाई सम्बोधन गर्दै ओलीले विभिन्न बहानामा देशलाई अस्थिरतामा लैजाने तमासा गरिरहेको बताए ।

राजनीति भनेको थाहै नपाएका, ढुंगा हान्न जानेकाले देश चलाउँछु भनेर उधुम मच्चाएको बताउँदै उनले ड्राइभिङ चलाउन नजानेकोले राम्रोसँग गाडी चलाउँछु भनेर जनतालाई छक्याएको आरोप लगाए । पूर्व राजा ज्ञानेन्द्र शाहप्रति लक्षित गर्दै केहि अराजक भिडले राजा ल्याउँछौँ भन्दा मख्ख परेको बताए । ‘दुई–चार मान्छेले राजा फर्काउछौं भन्दा गाडीको हुटमा चढेर हात हल्लाउँदै हिडेको पनि देखियो,’ प्रधानमन्त्री ओलीले भने, ‘यी कस्ता तत्व हुन् भन्ने कुरा चैत १५ गते काठमाण्डौको तीनकुनेमा देखियो । ठुला कुरा गर्नेहरु रक्सी चोर्दै भाग्दै हिडेको,स्याउ चोर्दै हिडेको देखियो ।’

राजावादी आन्दोलनका नाममा अराजक र हिंसात्मक गतिविधि गर्नेहरूलाई प्रधानमन्त्री बनाउनुभन्दा पशुपतिका बाँदरलाई प्रधानमन्त्री बनाउँदा उपयुक्त हुने उनको भनाई थियो ।

लोकतन्त्रप्रति खतरा बढेको भन्दै नेकपा एमाले कोशी प्रदेश कमिटीको आयोजनामा दमकको पशुहाटमा जागरण सभा भएको थियो ।