बिर्तामोड । नेकपा एमालेका अध्यक्ष केपी शर्मा ओलीले गठबन्धनले एमालेबाट उम्मेदवार चोरेर लगेको बताएका छन् । मंगलबार झापाको सालबारीस्थित शहीद सुखानी पार्कमा आयोजित कार्यक्रममा अध्यक्ष ओलीले झापा क्षेत्र नम्बर २ मा गठनबन्धनले एमालेबाट लगेर उम्मेदवार बनाएको टिप्पणी गरेका हुन् ।

ओलीले भने–‘अरुसँग उम्मेदवार नै छैन, हाम्रो पार्टीबाट तानेर लगेर उम्मेदवार बनाएको व्यक्ति देवराज घिमिरेका साधारण कार्यकर्ता हुन् ।’

ओलीले स्वतन्त्रका नाममा वा विभिन्न हाउभाउ गरेर आएपनि भ्रममा नपर्न आग्रह गरे । ‘कोही शंख फुक्दै त, कोही घण्ट बजाउँदै आएका छन्,’ उनले भने, ‘कपाल पालेर आउन पाइन्छ, लट्टा पालेर आउन पाइन्छ, मुन्द्रा र टप लगाएर आउन पाइन्छ ।’ ओलीले लोकतन्त्रको सुन्दर पक्ष यहि रहेको बताए ।

अध्यक्ष ओलीले उम्मेदवार हुनु एउटा कुरा हो, तर रहर लाग्दैमा सांसद हुन नसकिने बताए । उनले एमाले उम्मेदवारलाई विजयी बनाउन आग्रह गरे ।

२०४८ सालमा नेकपा एमालेको जिल्ला सदस्य बनेर तीन दशकसम्म पार्टीमा काम गरेका राना २ पटक शनिश्चरे गाविस अध्यक्ष बनेका थिए भने पछिल्लो समय अर्जुनधारा नगरपालिकाका प्रमुख भएर काम गरेका थिए । नेकपा एमाले गन्तव्यहीन र बा फाउण्डेशनको रुपमा परिणत हुँदै गएको भन्दै उनले पार्टी परित्याग गरेर गठबन्धनमा आवद्ध भएका थिए । यतिबेला राना गोलाकारभित्रको हँसिया हथौडा चुनाव चिन्ह लिएर झापा क्षेत्र नम्बर २ बाट प्रतिनिधिसभा सदस्यको उम्मेदवारको रुपमा चुनावी मैदानमा छन् ।