बिर्तामोड । आगामी मंसिर ४ गत हुने निर्वाचनका लागि प्रदेश १ का २८ निर्वाचन क्षेत्रका लागि ठूला तीन दल काँग्रेस, एमाले र माओवादीबाट २२१ जना उम्मेद्वार सिफारिसमा परेका छन् ।

प्राप्त विवरण अनुसार काँग्रेस र एमालेले १४ वटै जिल्लाबाट उम्मेदवार सिफारिस गरिसको छ भने माओवादी केन्द्रको भोजपुर र सोलुखुम्बुबाट सिफारिस हुन बाँकी छ । प्रदेश १ को २८ निर्वाचन क्षेत्रकालागि नेपाली काँग्रेसबाट ९२, एमालेबाट ७४ र माओवादी केन्द्रबाट ५५ जना उम्मेदवार सिफारिस भएको हो ।

सिफारिस भएका उम्मेदवारमध्ये एमालेबाट १३ जना, काँग्रेसबाट १० र माओवादी केन्द्रबाट ११ जनाउम्मेदवार सर्वसम्मत रहेका छन् । माओवादी केन्द्र प्रदेश १ का सहसचिव सागर किरातीले सोलुखुम्बुको सिफारिस हुनबाँकी रहेको बताए ।

सर्वसम्मत सिफारिस हुने एमाले नेताहरुमा पाँचथरबाट बसन्तकुमार नेम्वाङ, इलाम १ बाट महेश बस्नेत, इलाम २ बाट सुवासचन्द्र नेम्वाङ, झापा १ बाट रविन कोइराला, झापा ५ बाट पार्टी अध्यक्ष केपी शर्मा ओली, धनकुटाबाट राजेन्द्रकुमार राई, मोरङ २ बाट ऋषिकेश पोखरेल, मोरङ ३ बाट भानुभक्त ढकाल, मोरङ ४ बाट विनोद ढकाल, सुनसरी १ बाट जयकुमार राई, सुनसरी ३ बाट भगवती चौधरी, सुनसरी ४ बाट जगदिश कुशियत र सोलुखुम्बुबाट मानवीर राई रहेका छन् ।

यस्तै नेपाली काँग्रेसबाट सर्वसम्मत हुने ८ उम्मेदवारहरुमा पाँचथरका भिष्मराज आङ्देम्बे, झापा १ बाट विश्वप्रकाश शर्मा, झापा ३ बाट कृष्णप्रसाद सिटौला, झापा ४ बाट देउमान थेबे, धनकुटाबाट सुनिल थापा, मोरङ ३ बाट सुनिल शर्मा, सुनसरी ३ बाट विजयकुमार गच्छदार, सुनसरी ४ बाट ज्ञानेन्द्रबहादुर कार्की, सोलुखुम्बुबाट आङ्गेलु शेर्पा र उदयपुर १ बाट डाक्टर नारायण खड्का रहेका छन् ।

यस्तै माओवादी केन्द्रबाट सर्वसम्मत सिफारिसमा पर्नेहरूमा पाँचथरबाट हर्कबहादुर नेम्वाङ (मिक्सो), झापा १ बाट रामकार्की, झापा ४ बाट झलकसिंह दर्लामी, तेह्रथुमबाट इन्द्रबहादुर इम्सोङ लिम्बू, धनकुटाबाट हेमराज भण्डारी, मोरङ १ बाट प्रेम मिभक लिम्बू, मोरङ २ बाट गणेश उप्रेती सुशील, मोरङ ४ बाट अमनलाल मोदी, मोरङ ५ बाट शिवकुमार मण्डल र ओखलढुंगाबाट राम कार्की सर्वसम्मत सिफारिस भएका छन् ।