काठमाण्डौ । नेकपा माओवादी केन्द्रको महासचिवमा देव गुरुङ सर्वसम्मत चयन हुने भएका छन् । शनिबार बसेको पार्टीको स्थायी कमिटी बैठकले महासचिवमा प्रमुख दाबेदारी प्रस्तुत गर्दै आएका नेताहरु वर्षमान पुन र जनार्दन शर्मालाई पछि पार्दै गुरुङ महासचिवमा चयन हुने भएका हुन् । दुई नेतालाई उपमहासचिवमा बस्न राजी गराएर प्रचण्डले नयाँ विकल्पको रुपमा गुरुङलाई महासचिव बनाउने गरी बैठकमा प्रस्ताव लगेका छन् ।

स्थायी कमिटी बैठकमा प्रचण्डले २१ जना पदाधिकारी रहने प्रस्ताव पेश गरेको एक नेताले जानकारी दिए । जसअनुसार प्रचण्डको अध्यक्षतामा वरिष्ठ उपाध्यक्षमा नारायणकाजी श्रेष्ठ चयन हुने भएका छन् । यस्तै उपाध्यक्षमा कृष्णबहादुर महरा प्रस्तावित हुँदा उपमहासचिवमा पुन र शर्मासँगै पम्फा भुसाल, गिरिराजमणि पोखरेल, शक्ति बस्नेत, मात्रिका यादव र हरिबोल गजुरेलको नाम प्रस्ताव भएको  छ।

यस्तै सचिवमा  दिनानाथ शर्मा, चक्रपाणि खनाल, देवेन्द्र पौडेल, लीलामणि पोखरेल, गणेश शाह, हितमान शाक्य, हितराज पाण्डे, डिलाराम आचार्य र राम कार्की प्रस्ताव भएका छन् भने कोषाध्यक्ष श्रीराम ढकालको नाम प्रस्ताव छ ।

‘अध्यक्ष कमरेडले नाम प्रस्ताव गर्नुभएको छ । बैठकले हुबहु वा सामान्य संशोधन गरेर पास गर्न सक्छ । अहिले बैठक जारी छ,’ पार्टी कार्यालय स्रोतले भन्यो ।