बिर्तामोड । नेकपा माओवादी केन्द्र, नेकपा समाजवादीलगायत विभिन्न दल र समूहबिच एकता पश्चात बनेको नेपाली कम्युनिष्ट पार्टीको पहिलो झापा जिल्ला भेला सम्पन्न भएको छ । शुक्रबार गौरीशंकर स्मृति प्रतिष्ठानको सभाहलमा भेला सम्पन्न भएको हो ।

भेलाले समाजवादको यात्रामा अगाडी बढ्न एकता र बल चाहिने र त्यो एकता पश्चात मिलेको भन्दै मिलेर अगाडी बढ्ने संकल्प गरेको छ । नेपाली कम्युनिष्ट पार्टीले देशव्यापी गर्न लागेको एकता सन्देश सभा अन्तर्गत कोशी प्रदेशको विराटनगरमा मंसिर १५ गते हुने कार्यक्रम सफल बनाउन तयारीमा जुट्न भेलामा सर्कुलर जारी गरिएको थियो ।

कार्यक्रममा नेपाली कम्युनिष्ट पार्टी झापाको कार्यलय उद्घाटन गरिएको थियो भने वर्तमान राजनीतिक अवस्थाको प्रशिक्षणमुलक मन्तव्य राखिएको थियो । कार्यक्रमलाई नेताहरु हरिबोल गजुरेल (शितलकुमार), रञ्जित तामाङ र पुष्प पोखरेलले सम्बोधन गरेका थिए । अर्का नेता ज्योतिसिंह दर्लामीले गत बैठकको सर्कुलर वाचन गरेका थिए ।

बिपी भट्टराईको अध्यक्षतामा भएको कार्यक्रम मोहन टुडुले सञ्चालन गरेका थिए भने कार्यक्रममा सहभागीहरुलाई अम्बिकादेवि उप्रेतीले स्वागत गरेकी थिइन् ।

कार्यक्रममा एकता प्रक्रियामा सहभागी सबै दल तथा समूहका नेता कार्यकर्ताहरुको बाक्लो उपस्थिती रहेको थियो ।