पुषमा पाथिभरामा दर्शनार्थीले चढाए २९ लाख भेटी

झापा । ताप्लेजुङमा रहेको पाथीभरा मन्दिरमा पुष महिनामा २९ लाख २५ हजार भेटी संकलन भएको छ । अधिक चिसो हुने पुस महिनामा पनि ६ हजार ४ सय २७ जना तीर्थयात्री मन्दिरमा पुगेको र उनीहरुले २९ लाख २५ हजार रुपैयाँ भेटी चढाएको पाथीभरा क्षेत्र विकास समितिले जनाएको छ ।
क्षेत्र विकास समितिका कार्यकारी निर्देशक प्रजिन हाङवाङका अनुसार गत वर्षको तुलनामा यो संख्या बढी हो ।
गत वर्ष ४ हजार ५ सयको हाराहारीमा मात्रै तीर्थयात्री आएको समितिले जनाएको छ । ३ हजार ७ सय ९४ मिटर उचाइमा रहेको पाथीभरा मन्दिरमा चिसो याममा तीर्थयात्री कम आउने गरेको विगतको तथ्यांक छ । यो समयमा यहाँको तापक्रम माइनस हुने गरेको छ ।
‘आठ/दश वर्षअघिसम्म पुस र माघ महिनामा दर्शनार्थी ठप्पजस्तै हुन्थे,’ पाथीभराका पुजारी डिल्ली आचार्यले भने, ‘पछिल्ला वर्ष हिउँ पनि खेल्न पाइने र माताको दर्शन पनि हुने भन्दै आउने तीर्थयात्रीको संख्यामा वृद्धि भएको छ ।’
पाथीभरामा वार्षिक ३ लाखसम्म तीर्थयात्री आउने र ४ करोड रुपैयाँसम्म भेटी सङ्कलन हुने गरेको पाथीभरा क्षेत्र विकास समितिको दाबी छ ।