बिर्तामोड । बिर्तामोड उद्योग वाणिज्य संघका अध्यक्ष राजु न्यौपानेलाई मातृशोक परेको छ । दश दिनअघि आगलागीमा परी घाइते भएकी उनको उपचारका क्रममा निधन भएको हो ।

गएराति ९:४५ बजे भारतको सिलिगुडीमा उपचारका क्रममा न्यौपानेकी आमा अन्दाजी ८५ वर्षीया पुष्पलता न्यौपानेको निधन भएको हो ।

गत कात्तिक २७ गते हरिबोधनी एकादशीका दिन एकादशीको पूजा गर्दा दियोको आगो सल्किएर उनी घाइते भएकी थिइन् । पूजा गर्ने क्रममा दियोको आगो उनको कपडामा सल्किएको थियो । उनलाई उपचारका लागि बिर्तासिटी अस्पताल बिर्तामोडमा भर्ना गरिएको थियो ।

त्यहाँ उपचार संभव नभएपछि भारतको सिलिगुडी लगिएको थियो । स्वास्थ्य अवस्था गंभीर भएपछि हिजोदेखि उनलाई भेन्टिलेटरमा राखिएको थियो ।