बिर्तामोड । यतिबेला अमेरिकाको ४७औं राष्ट्रपति पदको निर्वाचनले विश्वको ध्यान खिचिरहेको छ । विश्व राजनीतिलाई नै प्रभाव पार्न सक्ने अमेरिकाको कार्यकारी प्रमुखको रुपमा रहेको राष्ट्रपति पदका लागि पूर्व राष्ट्रपति डोनाल्ड ट्रम्प र हालकी उपराष्ट्रपति कमला ह्यारिस चुनावी मैदानमा छन् ।

विश्व राजनीतिको केन्द्र बनेको अमेरिकाको राष्ट्रपति को बन्छ भनेर सबैको चासो हुनु स्वभाविकै हो भने सोहि निर्वाचनको उम्मेदवार बनेकी कमला ह्यारिसको बिषयमा समेत धेरैको चासो बढेको छ ।

को हुन् कमला ह्यारिस ?

हालकी उपराष्ट्रपति कमला ह्यारिसको वास्तविक नाम कमलादेवि ह्यारिस हो । सन् १९६४ मा बुवा एफ्रो–जमैकान मुलका डोनाल्ड जे. ह्यारिस र भारतीय मुलकी आमा स्यामोला गोपालनको कोखबाट उनको जन्म भएको थियो । उनको जन्म अमेरिकाको ओक्ल्यान्ड, क्यालिफोर्नियामा भएको थियो । उनकी आमा स्यामोला भारतीय मुलकी हुन् । उनी सन् १९५८ मा अमेरिका पुगेकी थिइन् ।

कमला पाँच वर्षको हुँदा उनका आमाबुवाले सम्बन्धविच्छेद गरेका थिए र उनलाई प्रायः उनकी आमा श्यामोला गोपालन ह्यारिसले हुर्काएकी थिइन् । उनी क्यान्सर अनुसन्धानकर्ता र नागरिक अधिकार अभियानकर्ता थिइन् ।

कमला र बहिनी मायालाई उनकी आमाले ओक्ल्यान्डको अश्वेत समुदायसँगै हुर्काएकी थिइन् ।

कमलाले हावर्ड यूनिभर्सिटीमा अध्ययन गरिन् । उक्त विश्वविद्यालय अमेरिकाको उत्कृष्ट अश्वेत शैक्षिक संस्थामध्ये पर्छ । त्यहाँ उनी दक्षिण अफ्रिकाको रङ्गभेदविरुद्धको सङ्घर्ष र अमेरिकामा जातीय सम्बन्धजस्ता राजनीतिक मुद्दाहरूमा संलग्न भइन् ।

ह्यारिसले अलमिडा काउन्टी डिस्ट्रिक्ट अटोर्नीको कार्यालय ओक्ल्यान्डबाट आफ्नो कार्यकाल थालेकी थिइन् । ह्यारिसको व्यावसायिक जीवन एलमिडा काउन्टीस्थित जिल्ला सरकारी वकिलको कार्यालयबाट सुरु भएको थियो ।

यूनिभर्सिटी अफ क्यार्लिफोर्निया, ह्यास्टिङ्सबाट कानुनको अध्ययन पूरा गरेर उनी वकिल बनेकी थिइन । उनले क्यालिफोर्नियाका विभिन्न जिल्ला सरकारी वकिलका कार्यालयहरूमा काम गरेकी थिइन् । सन् २०१० मा उनी क्यालिफोर्नियाको महान्यायाधिवक्ता बनिन । सन् २०१६ मा उनी अमेरिकाको सिनेटर चुनिएकी थिइन ।

सन् २०२० मा ह्यारिस डेमोक्र्याटिक पार्टीबाट राष्ट्रपति उम्मेदवार बन्ने अभियानमा संलग्न भइन । यद्यपि उनी प्रारम्भिक चरणबाट आन्तरिक प्रतिस्पर्धाबाट पछि हटिन् र आफू राष्ट्रपतिको उम्मेदवार मनोनीत भएपछि जो बाइडनले उनलाई उपराष्ट्रपतिको उम्मेदवार बनाए । उनी अमेरिकाको पहिलो महिला उपराष्ट्रपति बनिन् ।

(एजेन्सीको सहयोगमा तयार पारिएको)