पोखरा । जिल्ला अदालत कास्कीले सहकारी रकम अपचलन अभियोगमा पक्राउ परेका पूर्वगृहमन्त्री रवि लामिछाने र पूर्व डीआइजी छविलाल जोशीलाई अनुसन्धानका लागि सात दिन म्याद थप गरेको छ । जिल्ला अदालत कास्कीका न्यायाधीश चन्द्रकान्त पौडेलको इजलासले थप सात दिन थुनामा राखी अनुसन्धान गर्न अनुमति दिएको हो ।

जिल्ला अदालत कास्कीका सूचना अधिकारी सुरज अधिकारीले लामिछाने र जोशी दुवैविरुद्ध सात दिन म्याद थप भएको जानकारी दिए । कात्तिक २ गते पक्राउ परेका लामिछानेलाई यसअघि गएको आइतबार अदालतले छ दिन हिरासतमा राखी अनुसन्धान गर्न अनुमति दिएकोमा म्याद बुधबार सकिएको थियो । असोज ६ गते पक्राउ परेका जोशीको म्याद पनि बुधबारै सकिएको थियो ।

उनीहरु विरुद्ध सूर्यदर्शन सहकारीको रकम गोरखा मिडियामा लगेर अपचलन गरेको अभियोगमा प्रहरीले अनुसन्धान गरिरहेको छ । गोरखा मिडियामा पोखराको सूर्यदर्शनसहित देशका विभिन्न सहकारीबाट ६५ करोड रुपियाँ रकम अवैधानिक रुपमा गएको संसदीय समितिको प्रतिवेदनमा उल्लेख छ । सूर्यदर्शनको मात्रै पाँच करोड ५८ लाख रकम गोरखा मिडियामा गएको विभिन्न प्रतिवेदनले देखाएका छन् ।