बिर्तामोड । झापामा बिहीबार भएको अलग–अलग दुर्घटनामा परि २ बर्षीय बालक र ६५ बर्षीय वृद्धको मृत्यु भएको छ । बिर्तामोड–३ मा भएको सवारी दुर्घटनामा परि ६५ बर्षीय आसारुलाल पानवारी र अर्जुनधारा ६ मा घरको गेटले किचेर २ बर्षीय शिवयम मस्कराको मृत्यु भएको हो ।

बिहीबार साँझ ६ः३० बजे बिर्तामोड–३ बिर्ताबजारमा बनियानीबाट बिर्ताबजार तर्फ आउदै गरेको मे १ च ५९३० नम्बरको छोटा हात्ती गाडीले पैदल यात्री भारत बहादुरगञ्ज घर भई बिर्तामोड–३ सैनिकमोडमा डेरा गरी बस्ने ६५ बर्षीय आसारुलाल पानवारीलाई ठक्कर दिँदा गम्भीर घाइते भएको र उपचारका लागि बिर्तासिटी अस्पताल लगिएकोमा उपचारको क्रममा शुक्रबार बिहान २ बजे मृत्यु भएको जिल्ला प्रहरी कार्यालय झापाले जनाएको छ ।

गाडी चालक कनकाई ८ का ४६ बर्षीय मानबहादुर भुजेललाई इलाका प्रहरी कार्यालय अनारमनीले नियन्त्रणमा लिएको प्रहरीले जनाएको छ ।

त्यस्तै बिहीबार साँझ ८ बजे अर्जुनधारा–६ स्थित ऋषि अग्रवालको घरमा (मावला) आएका सोहि स्थान बस्ने सवनम मस्कराको २ बर्षीय छोरा शिवयम मस्करालाई खेल्ने क्रममा घरको फलामको गेटले किच्दा सख्त घाइते भएको जिप्रका झापाले जनाएको छ । उनको उपचारको क्रममा शुक्रबार बिहान ६ः१५ बजे बिएण्डसी अस्पतालमा मृत्यु भएको जिप्रका झापाका सुचना अधिकारी डिएसपी कृष्णकुमार चन्दले जानकारी दिए ।