झापा । सुख्खा पहिरो खसेर अवरुद्ध भएको बीपी राजमार्ग अहिले एकतर्फी सञ्चालन गरिएको सडक डिभिजन कार्यालय भक्तपुरले जनाएको छ ।

कार्यालयका प्रमुख सुमन योगेशका अनुसार, पहिरो पन्छाएर शुक्रबार दिउँसो २ः३० बजेदेखि एकतर्फी यातायातका साधन सञ्चालनमा आएका छन् । सुख्खा पहिरो झरिरहेकाले निकै नै सावधानी अपनाउन उनले आग्रह गरेका छन् ।

शुक्रबार बिहान करिब ३ बजेतिर समयमा काभ्रेको रोशी गाउँपालिका वडा नं ११, पिप्लेमा माथिबाट सुख्खा पहिरो आएर राजमार्ग अवरुद्ध भएको थियो । खोटाङबाट काठमाण्डौतर्फ आउँदै गरेको ना१ज ६८१७ नम्बरको सुमोलाई सोही स्थानमा माथिबाट आएको सुख्खा पहिरोले पुरेको थियो ।

त्यस्तै, सिन्धुलीबाट काठमाण्डौतर्फ आउँदै गरेको बा.४ख ४३५२ नम्बर बसलाई रोशी खोलाछेउ पुर्याएको थियो । दुवै दुर्घटनामा कुनै पनि मानवीय क्षति नभएको जिल्ला प्रहरी कार्यालय काभ्रेले जनाएको छ ।